CEBU, Philippines – Daku kaayo niyang garbo nga nahatagan na niya og dungog ang nasud human siya misakmit sa silver medal sa miaging SEA Games, apan ang two-time National Milo Marathon queen nga si Mary Joy Tabal, aduna karo’y lahi nga misyon isip usa ka atleta.
Si Tabal wala midagan sa Cebu leg sa National Milo Marathon niadtong Domingo, apan daku gihapon ang gihimo niyang papel tungod kay mitambong siya sa lumba aron giyahan ang mga batan-ong runners nga apil sa grassroots program sa Cebu City Sports Commission (CCSC).
Uban iyang long-time coach nga si Philip Duenas, si Tabal padayon karon sa iyang adbokasiya sa pagbansay ug pagkaplag og mga batan-ong runner nga adunay potensiyal nga mahimong running star ugma damlag.
Miabot sa 47 ka mga grassroots runners ang midagan sa miaging Milo Marathon nga nagagikan sa barangay Guba, ang gigikanan ni Tabal.
Ug tuod man, nakita dayon ang bunga sa adbokasiya ni Tabal ug Duenas human sila si Jessel Ochia, Carl John Beboso ug Juvan Yongco midaog sa 3K kids run.
Si Ochia maoy nag-una sa girl’s division nga mioras og 12:00, samtang sila si Beboso ug Yongco miangkon sa ikatulo ug ikalimang luna sa boys’ class sa oras nga 11:42 ug 11:49.
“Goal gyud namo ni coach Philip (Duenas) nga maka-discover ug makatabang mi og develop og future runners. Ang uban ning mga bataa miingon nga ganahan sila nga mapareha nako mao sab nga nituo ko sa potensiyal nila,” matud pa ni Tabal.
“Hopefully in the future aduna na pud ta’y mga pambato sa SEA Games and makahatag nato og medals.”
Nakadugang hinuon sa kadasig sa mga batan-ong runners ang gihatag nga suporta kanila sa Nestle Phils. ug sa Milo tungod kay silang tanan nakadawat og mga bag-ong ‘running shoes’ nga maoy ilang gigamit sa lumba.
Mikompisal si Tabal nga personal siya nga mihangyo ni Milo sports executive Andrew Neri ug wala siya mapakyas tungod kay positibo ang tubag sa nauwahi ngadto kaniya.
“Ako gisultian si sir Andrew about sa akong program ug nindot iyang feedback maong nagpasalamat kaayo ko sa Milo sa ilang suporta,” matud pa ni Tabal.
Gawas sa pag-train og mga batan-ong runners, si Tabal hinay-hinay na usab nga nangandam alang sa pagdepensa niya sa iyang korona sa Milo Marathon National Finals nga gitakda sa Disyembre didto sa Angeles City sa Pampanga. (BANAT NEWS)