Cebu leg sa Milo Marathon gidayeg
CEBU, Philippines – Sa makausa pa gipakita na usab sa mga Sugbuanon nga usa kita sa mga dapit nga grabeng mahiligon sa natad sa sports running human sa laing malampuson nga Cebu leg sa Milo National Marathon kagahapon didto sa Cebu City Sports Center.
Miabot sa 23,713 ka mga Cebuano runners ang misalmot sa ika-39 edition sa usa sa mga labing karaang lumba sa Sugbo.
Si Rio Dela Cruz sa RunRio mibilib sa Sugbo isip usa sa mga provincial leg sa Milo Marathon. “Cebu is one of the most organize leg,” matud pa ni Dela Cruz. “Next to Manila, the Cebu leg has the most number of participants.”
Tungod niini si Dela Cruz masaligon nga mas mudako pa ang matag edisyon sa lumba nga ipahigayun sa Sugbo sa umaabot.
Bukas usab sa posibilidad si Dela Cruz nga anhi sa Sugbo ipahigayun ang National Finals sa umaabot.
“Yes may possibility and we are looking to it in the future na dito naman sa Cebu ang National Finals,” dugang pa ni Dela Cruz.
Miabot usab sa 104 ka mga runners ang misakmit og luna sa qualifiers aron mudagan sa National Finals nga mahitabo sa Disyembre didto sa kaulohan.
Si Cebu leg organizer Ricky Ballesteros nagkanayon nga aduna usab mga langyaw nga runners ang misalmot ug natagbaw sa Milo Marathon.
Gawas sa mga partisipante, daku usab ang pasalamat ni Ballesteros sa mga volunteers, marshals, police, medical teams ug mga traffic enforcers nga maoy misegurado sa seguridad sa mga runners. (BANAT NEWS)
- Latest
