CEBU, Philippines - Nakabaton man tuod sila og 2-1 nga bentaha sa ‘head-to-head’ record, apan si University of San Carlos Warriors head coach Britt Reroma mihulagway sa iyang koponan isip 'underdogs’ kon dehado batok sa University of the Visayas Green Lancers sa ilang “best-of-five” collegiate division finals sa 15th Cebu Schools Athletic Foundation, Inc. (CESAFI) men’s basketball tournament nga sugdan na ugmang adlawa diha sa Cebu Coliseum.
Ang Warriors maoy unang mibirada sa iskor nga 79-69, apan pait nga panimalos ang gipahamtang kanila gikan sa Green Lancers, kinsa milubong kanila og 31 puntos, 74-43 sa ikaduha nilang engkuwentro. Dali ra sab hinuon nga gipapas sa Warriors ang kapait sa maong kaparotan human ilang gibuntog ang Green Lancers sa overtime, 79-75 atol sa ilang engkuwentro sa semifinals.
Bisan og pabor sila sa tapad segun sa pagtan-aw sa uban, si Reroma mapaubsanong namahayag nga usa ka dakung hagit kanila ang sangkaon ang usa ka dekalibreng kontra sama sa Green Lancers nga adunay lapad nga kasinatian kun kampiyonato maoy hisgutan.
“We are the underdogs in this final series because we are playing opposite the 10-time CESAFI champions with a very deep lineup,” matud pa ni Reroma.
“We must be mentally tough in the series. Playing against UV is a tough task but we must enjoy and grab this opportunity to give our best for USC.”
Sa iyang bahin, si UV coach Gary Cortes naglantaw nga molanat ang ilang engkuwentro ngadto sa Game 5.
“The finals is always been an anybody’s game. I think it will go the distance,” sumala pa ni Cortes.
Sama ni Reroma nga taas og pagtan-aw sa Green Lancers, si Cortes taas sab og respeto sa Warriors ug iyang gilantaw nga kun kinsa kadtong mas gutom nga koponan hayan nga maoy moguwa nga magmadaogon sa kinatumyan sa ilang serye.
“They are a solid, intact team and very aggressive for they are looking for their very first CESAFI title. UV has already won 10 championships. But me, coach Jomags (Jojo Maglasang) and our players, especially the rookies, are all yearning to feel what it is like to be the CESAFI champions,” dugang pa ni Cortes. (BANAT NEWS)