CEBU, Philippines - Usa ka kulbahinam kaayo nga finals ang gidalit sa Petron Goldberry ug sa RDAK Stallions sa Game-1 sa Division A finals sa SHAABAA Cup basketball tournament niadtong Miyerkules didto sa Sacred Heart School old campus sa Gen. Maxilom avenue, ning dakbayan sa Sugbo.
Ang Goldberry miiskor og 54-53 sa Game-1 aron makauna sa ilang best-of-three finals series.
Si Job Shan maoy nangu sa Goldberry sa iyang 13 puntos, lakip ang iyang duha ka free throws nga maoy miselyado sa kadaugan. Si Leigh Dixon midugang og 11 puntos.
Ang Stallions gipangulohan ni Jair Igna nga adunay 32 puntos, apan nausik ang iyang paningkamot kay napuhalan sila sa mas eksperyensiyado nga Goldberry.
Ang Game-2 himuon karong Domingo didto sa Magis Eagles gym sa Sacred Heart School-Ateneo de Cebu sa Barangay Canduman, Mandaue City diin suwayan sa Goldberry nga tapuson ang best-of-three series. Himuon sab ang sangka alang sa ikatulong puwesto tali sa Bayfront Hotel Cebu ug Cebu Landmasters. (BANAT PALARO)