Ms motosuit nakaipsot batok Luigi-Sebandal
CEBU, Philippines - Si Noel Dicdican mipasud sa iyang 10 ka sunod-sunod nga puntos sa fourth quarter aron tabangan ang MS Motosuit nga modaog batok sa Luigi-Sebandal, 68-65 sa second conference sa Los Amigos Basketball Association (LABA) President’s Cup 2015 basketball tournament niadtong Lunes sa gabii didto sa Barangay Banilad Sports Center, dakbayan sa Mandaue.
Apan si Rechel Bamba maoy nangu sa opensa sa MS Motosuit nga miratsada og 21 puntos, samtang si Dicdican mikamada’g 19 puntos, lakip ang ‘back-to-back’ triples aron hatagan ang koponan og tres puntos nga labaw, 62-59.
Ang playing coach ug MS Motosuit big boss nga si Lou Ornopia miambit og 10 puntos alang sa iyang koponan.
Ang Luigi-Sebandal milabaw sa labing unang higayon, 51-50 sa sayong bahin sa fourth period kortesiya sa free throw ni Eman Pacquiao, apan dali sab kini nga nailog sa MS Motosuit.
Si kanhi USPF Panthers Joel Gabayan maoy nangu sa Luigi-Sebandal nga mipabuhagay og 22 puntos, gisundan ni Pacquiao nga adunay 16 puntos, apil na ang walo ka sunod-sunod nga puntos nga mipasikit sa duwa, 47-50 sa pagtapos sa third quarter.
Ang MS Motosuit nagbitbit na karon og 2-2 nga baraha, samtang ang Luigi-Sebandal wala pa’y daog sa tulo ka duwa ning maong torneyo nga gipasiugdahan sa Los Amigos Basketball Association ubos sa liderato ni councilor Gilbert Sebandal.
Sa laing bahin, ang tulo ka LABA Legends nga sila si Cesar Lee, Rudy Candelada ug Dennis Patindol misaksi sa maong duwa aron paghatag og suporta sa maong liga.
Ang mga duwa gidumala ni league commissioner Geryl Bukiron inabagan ni Lloyd Chavez ug ingon man nilang Chang Tejero, Eduard Escorial, Abel Bacalso ug Kenneth Tagalog. (BANAT PALARO)
- Latest
