DTCC morampa sa DSCPI national finals
CEBU, Philippines - Ang mga sakop sa Dancesport-Team Cebu City magsagubang na sab og lisud nga hagit sa ikatulo ug katapusang leg sa DanceSport Council of the Philippines, Inc. (DSCPI) National DanceSport Championships karong Sabado didto sa Philsports Arena.
Sa maong kompetisyon, ang DTCC mopadala og 18 ka mga tadhang paresan sa tinguha nga sakmiton na usab ang kampiyonato.
Sa unang leg sa maong national series, ang DTCC mikabkab og 13 ka gold, walo ka silver ug unom ka bronze medals, samtang sa ikaduhang leg nga gitawag sab og mid-ranking mihakot sila og 15 ka gold, duha ka silver ug lima ka bronze medals.
Mga batan-ong pambato sa Sugbo ning higayona naglangkob nilang Ouie Selene Rendon ug John Lloyd Leyson, Jake Emmanuel Corro ug Andrea Capangpangan, Andrey Ysla ug Noelyn Pedrano, John Paul Mocorro ug Mary Joy Dumosdong ug Bert Kevin Deluvio ug Jam Flores.
Samtang mga tang-an nga batos sa DTCC nga seguradong momina og bulawan mao sila si Wilbert Aunzo ug Pearl Caneda ug ingon man silang Ansel Estellore ug Mary Desiree Seraga. (BANAT PALARO)
- Latest
