CEBU, Philippines – Sakop sa Cacoy Doce Pares World Eskrima Federation nga si John Mac mihakot og tulo ka gold medals ug usa ka silver medal sa bag-o lang natapos nga Bali International Stickfighting Challenge kaniadtong Septiyembre 24-27 didto sa Bali, Indonesia. Tungod niini, si Mac, kinsa usa sa mga chief instructors sa Doce Pares headquarters diha sa dan C. Padilla, maoy nakakuha sa Best Male fighter award.
Si Mac maoy midaog sa gold medal sa single stick category, double stick category ug sa kulata gold challenge.
Hinoon, igo lang siyang nakakuha'g silver medal sa double stick kulata challenge sa open weight category.
Si GM Mac, usa sa mga sinaligan ni Supreme Grand Masters Ciriaco "Cacoy" Cañete, maoy kanhi 7-time world champion sa Cacoy Doce Pares World Championships ubos sa super middleweight division.
Ang una niyang pagdaog og world title nahitabo niadtong 1996 atol sa 4th World WEKAF Championships didto sa Van Nuys sa Los Angeles, California.
Nahimo siyang Most Notable Eskrima Competitor of the Year 2008 sa Doce Pares Hall of Fame, ug nakadawat sab og pasidungog isip Notable Filipino Martial Artist Award niadtong 2010, Valuable Doce Pares Grandmaster Award sa 2012 ug nahimong inductee ngadto sa United States Martial Artist Hall of Fame sama sa iyang "maestro" o supremo nga si Cacoy niadtong tuig 2013 ug gipasidunggan sab og Valuable Contribution in the Promotion of Cacoy Doce Pares Awards sa miaging tuig.
Si Mac gikatakdang molarga ngadto sa Berlin, Germany ug sa Spain aron mopahigayon og mga eskrima seminars didto sa mga nahisgotang lugar.
Molarga siya sa Germany karong Sabado, Oktubre 10-11 alang sa seminar ug sa Spain unya sa Nobiyembre 28. (BANAT NEWS)