CEBU, Philippines – Mga piniriso sa Cebu Provincial Detention and Rehabilitation Center (CPDRC) makasaksi na sab og huego-todo nga sinukmagay pinaagi sa pagpahigayon sa “Champions of the Future II” fight card karong gabii sa maong bilanggoan nga anaa mahimutang sa Barangay Kalunasan, dakbayan sa Sugbo.
Magsangka sa main event mao si kanhi WBO Asia-Pacific Youth champion Magos R. Singwangcha ug Ryan Tampus sud sa 10 ka hugna nga kumbati ubos sa super flyweight division.
Tulo ka tuig ang milabay, si Magos (11-5,7KOs) mitali sa labing daku nga daog sa iyang karera sa dihang nakabangon siya human matumba sa unang hugna dayon na ngadto sa pagpatikangkang sa kanhi wa’y pildeng si Aston Palicte sa ikaupat nga hugna. Midaog sab siya didto sa Japan batok ni Kohei Kubo, apan naputol ang iyang pagratsada human makatilaw og duha ka sunod-sunod nga pilde didto sa Thailand batok nilang Pungluang Sor Singyu ug Chatpetch Sithmorseng.
Sa iyang bahin, si Tampus (11-15,8KOs) misukarap human siya midaog pinaagi sa TKO batok sa kanhi wa’y pildeng si Eduard Penerio niadtong 2011.
Magsangka sa undercards mao sila si Joaquino E. Singwangcha batok Jonathan Ricablanca, Junriel Jimenez batok Jimboy Sabado, Jeffrey Stella batok Rey Millano, Rimon Rama batok Erbert Donato ug Mark Rotilles batok Jenebal Peregrino. Aduna sa’y amateur bouts tali sa CPDRC Supermax Boxing Team batok sa mga pambato sa Phil-Aust Boxing Club. Ang maong event gipaluyohan ni Thai boxing patron Naris Singwangcha inabagan sa Rex ‘Wakee’ Salud Promotions International ug ni CPDRC consultant Marco Toral. (BANAT NEWS)