SWU Spikers nakaipsot batok USPF

CEBU, Philippines – Nagkahayag ang paglaum sa  Southwestern University spikers  nga  madepensahan ang ilang korona  human makaeskapo batok sa University of Southern Philippines Foundation  sa kulbahinam nga lima ka sets sa men’s volleyball event sa 15th Cebu Schools Athletic Foundation, Inc. season kagahapon didto sa University of San Carlos-main gym.

Ang USPF misurprisa sa SWU sa unang set, 25-23, apan ang Spiking Cobras miresbak pinaagi sa pagpakyaw og daog sa  sunod nga duha ka sets, 25-19, 25-20 ug pag-angkon og 2-1 nga bentaha.

Nakapuwersa og decider ang Panthers human midaog sa ikaupat nga set, 25-22, apan mao na kadto ang katapusan nilang utong gumikan kay ang Cobras maoy midominar sa rubbermatch, 15-10.

Ang SWU men’s naghinaut nga mobira og finals ticket sa ilang pakigharong batok sa USC karong hapon didto sa University of San Jose-Recoletos Basak Campus gym.

Sa women’s  division, ang SWU mitapos sa ilang kampanya sa eliminasyon pinaagi sa pagpakaging sa University of Cebu, 25-12, 25-21, 25-15.

Sa secondary girls semis, ang SWU midaog batok sa USC, 25-19, 25-19. (BANAT NEWS)