CEBU, Philippines - Sud lamang sa 28 minutos, gikulinitan ang dul-an sa tres mil ka mga slots nga gitagana alang sa Ironman Asia Pacific Championships nga gikatakda sa Agosto 7 sunod tuig didto sa Shangri-La’s Mactan Resort and Spa sa dakbayan sa Lapu-Lapu.
Gumikan niini, gibuak sa Sugbo ang karaang rekord sa labing paspas nga rehistrasyon nga ilang natala sa miagi niining pag-host sa Cobra Energy Drink Ironman 70.3 Philippines niadto lamang bulan sa Agosto.
Sa miaging tuig, ang 2,400 ka slots nahurot sud sa 40 minutos, apan ning higayona, daw kilat nga gipistahan ang 2,900 ka mga luna nga gigahin sa mga organizers nga nahurot sud lamang sa 28 minutos human pormal nga giablihan ang rehistrasyon sa alas-7 sa buntag kagahapon didto sa Cebu Provincial Capitol.
Hinuon, wala pa hingpit nga mabayri ang katunga sa tanang mga slots nga nakuha atol sa pagtak-op sa rehistrasyon sa alas-10 sa buntag.
Miabot ngadto sa 24 ka nasud ang girepresentar sa mga triathletes nga nagparehistro sa labing unang Ironman Aspac event sa Asya ug palaran kaayo ang mga Sugbuanon kay dinhi sa Sugbo mahitabo ang maong makasaysayanong karera.
Gawas sa Ironman, ang Sunrise Events Inc. nga maoy nagpadagan sa labing daku nga triathlon event sa nasud mibukas sab sa rehistrasyon sa uban pa nilang events sa 2016 nga naglangkob sa Xterra Albay, Century Tuna Ironman 70.3 Subic Bay Philippines, Alaska Ironkids Philippines, Regent 5i50 Triathlon, ug Bellevue 5i50 Triathlon. (BANAT PALARO)