UV, USC Ilog Luna sa Finals
CEBU, Philippines - Magsangka karon ang topseeds University of the Visayas Green Lancers ug ang University of San Carlos Warriors diin ang modaog maoy makakuha sa unang luna sa finals sa Cebu Schools Athletic Foundation, Inc. (CESAFI) basketball tournament diha sa Cebu Coliseum.
Sugdan ang duwa sa alas-6:45 sa gabii human gyud sa engkuwentro tali sa University of San Jose-Recoletos Jaguars ug Southwestern University Cobras nga sugdan sa alas-5:15 sa hapon.
Ang Lancers ug ang Warriors parehong nagbitbit og 1-1 records sa ilang head-to-head match-up sa double round elimination.
Unang midaog sa first round ang Warriors, 79-69 niadtong Agosto 22, apan nakabawos ang Lancers sa second round pinaagi sa ilang 31 puntos nga kadaugan, 74-43 niadtong Septiyembre 22.
Sa gihapon, ang Lancers ni coach Gary Cortes magsalig sa iyang mga hait nga hinagiban sama nilang Steve Cedrick Akomo, Francisco Arong, Leonard Santillan, Alfred Codilla ug June Kent Manzo.
Samtang si Warriors coach Britt Reroma adto sab magsandig nilang Shooster Olago, Ian Tagapan, Victory Rabat, Ian Ortega, Nico Magat ug Charles Pepito. (BANAT NEWS)
- Latest
