CEBU, Philippines - Kumpleto na ang semifinal casts sa seniors division human midaog ang Universirty of San Jose-Recoletos Jaguars, 73-53 batok sa University of Cebu Webmasters sa 15th Cebu Schools Athletic Foundation, Inc. (CESAFI) kagahapon didto sa Cebu Coliseum.
Ang Jaguars makig-uban sa University of San Carlos Warriors, University of the Visayas Green Lancers ug Southwestern University Cobras nga daan nang miabante sa semifinals.
Ang semifinals sugdan karong Martes diin magbagat ang Warriors batok Jaguars, samtang ang Green Lancers makigsangka sa Cobras. Ning pagsuwat, padayon pang nagduwa sa usa ka non-bearing game ang Green Lancers ug ang Cobras.
Si Kelvin Villafranca maoy nangu sa opensa sa Jaguars pinaagi sa iyang 18 puntos, samtang si Jayvie Mantilla mihimo’g double-double sa labing unang higayon sa iyang 10 puntos uban sa iyang 11 ka rebounds, tulo ka assists ug usa ka steal nga igo na kaayo alang kaniya nga mapiling best player.
Mipakita sab og maayong performance si Mark Labares, kinsa miamot og 15 puntos, samtang si Ralho Dinolan mitimang og 12 puntos.
Ang Webmasters gipangulohan ni Melvin Butohan pinaagi sa iyang 12 puntos nga ubos kaayo kun itandi sa miagi niyang produksiyon.
Nakita nga naglisud gyud ang Webmasters pagpiog sa Jaguars bisan unsaon nila’g paningkamot.
Wala makahuygo silang Garciano Puerto ug Earl Montilla nga igo lang nagkumboya’g nuybe puntos. Wala sab makapuntos si Joseph Mayol nga nakatampo sa kapildihan sa Webmasters.
Si Clint Suelto mitampo’g 11 puntos, samtang si Filvenson Culango miabuno’g 10 puntos sa natagak nga Webmasters. (BANAT NEWS)