Kuwait gilabhan sa Gilas

CEBU, Philippines – Gitapos sa Gilas Pilipinas ang preliminary rounds sa FIBA Asia Championship  pinaagi sa impresibong kadaugan  batok sa Kuwait, 110-64, kagabii didto sa CSWC Dayun gym sa Changsha, China.

Ang Gilas moabante na sa second round uban ang bugtong koponan nga nakapilde  nila nga Palestine ug Hong Kong.

Ang bag-ong sakop sa Gilas nga si Terrence Romeo maoy miarte sa maong duwa diin mipakita siya sa iyang kinangilngigan nga duwa aron moiskor   og 19 puntos, samtang si Jayson Castro miantog og 16 puntos.

Bisan og dili kaayo hapsay ang dagan sa opensa sa Gilas sa first half, nakahimo gihapon sila paglubong sa Kuwait, 34-11 sa first  quarter ug mihangtod  kini sa second half diin mitubo ang labaw, 94-63 paingon sa final period.

Ang Kuwait nga natagak sa Group A wala’y ikasagubang sa bangis nga fastbreak plays ug shooting sa Gilas. Apan bugnaw sila sa ilang free throws diin nakapasud lang sila og 12 sa 31 ka attempts.

Ang Gilas midominar sab hinuon sa rebounding  ubos sa pagpangulo ni naturalized player Andray Blatche diin  milangkat  sila og 52 ka rebounds  batok sa Kuwait nga adunay 26.

Diriyot miulbo ang kagubot sa hinapos nga bahin sa duwa dihang miaksyon og hamag si Abdum Almahidi sa Kuwait ngadto ni Ranidel De Ocampo ug sa usa ka referee human wala tawgi ang pagsiko ni De Ocampo sa iyang baba.

Sa wala pa kini, si Almahidi unang miigo sa pus-on ni De Ocampo, apan grabe ang reaksiyon niini dihang nabawsan sa Pinoy forward.

Ang Gilas mopahuway karong adlawa samtang nagpaabot  kun kinsa ang una nilang sangkaon sa Group B nga naglangkob sa  Iran, Japan ug India. (BANAT NEWS)