CEBU, Philippines - Ang Lexmark Stallions mibuntog sa Teleperformance All-Stars, 80-70 alang sa ikawalo nilang sunod-sunod nga daog, samtang ang Convergys Blue Devils mimakmak sa Sykes Pioneers, 76-69 alang sa labing una nilang daog sa 11th CSCC E-League men’s basketball tournament niadtong Domingo didto sa City Sports Club-Cebu gym.
Si Vill Duero mitipig og 17 puntos uban ang unom ka rebounds ug lima ka assists, samtang si Franco Angelo Cipriano midugang og 14 puntos, walo ka rebounds alang sa Lexmark nga nagsandig sa mainit niining opensiba sa final half aron pagtumba sa Teleperformance ug ingon man pagpahugot sa ilang pagkupot sa liderato sa Elite Classic bitbit ang 8-0 nga baraha.
Si Ryan Veloso mitapos og 14 puntos, walo ka rebounds, samtang si Marcos Genteli Jungoy III adunay 12 puntos, upat ka rebounds ug upat sab ka assists alang sa Teleperformance nga nahisukamod ngadto sa 6-2 uban ang Accenture Sharks, kinsa mitali sa ikaunom nilang daog sa walo ka duwa human gibuntog ang Eperformax Reds, 62-60.
Sa laing bahin, si Oscar Villamor Jr. mipabuto og 29 puntos uban ang pito ka rebounds alang sa Blue Devils nga miputol na sa pito ka sunod-sunod niining kapildihan.
Sa bugtong duwa ubos sa Evo League, ang Author Solutions, Inc. Hardbacks miposte og kulbahinam nga kadaugan batok sa The Resuls Companies Spartans, 68-65 aron pag-inat sa ilang win-loss record ngadto sa 5-4 sama sa ilang biktima. (BANAT NEWS)