CEBU, Philippines – Ang Australyanong si Brodie Barden ug Lana Skrigic de Fonseka maoy nanghawod sa Cebu WDSF Open Dancesport Championship 2015 niadtong Sabado sa gabii didto sa grand ballroom sa Waterfront Cebu City Hotel and Casino.
Sila si Barden ug De Fonseka maoy midominar sa modern standard ug ingon man nalandig sa ikaduhang puwesto sa Latin event sa WDSF Open.
Gipilde nilang Barden ug De Fonseka mao sila si Artur Kozun ug Kamila Wierzynska sa Poland.
Sila si Edgar Marcos Borjas ug Alina Sabalo sa Spain maoy naghari sa Latin event aron pugngan silang Barden ug De Fonseka nga makasakmit og duha ka korona.
Ang mga sakop sa Philippine team nga sila si Gerald Jamili ug Cherry Clarice Parcon maoy mipahiluna sa ikatulong puwesto, samtang ang pambato sa Sugbu nga sila si Wilbert Aunzo ug Pearl Marie Cañeda mikapyot sa ikaupat nga dapit.
Gawas sa nakab-ot nilang Aunzo ug Cañeda, ang DanceSport-Team Cebu City nakasigpat og laing rason nga magselebrar human sila mihakot og 15 ka gold, 14 ka silver ug 13 ka bronze nga igo ra kaayong nakapilde sa karibal nilang tag Manila nga nakmina sab og 15 ka bulawang medalya apan inubanan lamang og unom ka silver ug pito ka bronze.
Nangu sa kampanya sa Dancesport-TCC mao sila si Mae Paracuelles ug Lloyd Bartolini nga milupig sa ilang teammates nga sila si Zijane Troy ug Zjiana Tracy Villarta aron angkunon ang gold sa amateur close competition sa standard event. Ang mga Villarta nakabira hinoon og gold sa youth 5 standard gold.
Sila si John Lloyd Leyson ug Ouie Selene Rendon milabnot og duha ka gold sa juvenile 5 standard ug latin, samtang sila si Andrew Ysla ug Noelyn Mie Pedrano maoy mipatigbabw sa youth 5 latin ug youth 3 standard.
Si Mae Pabuaya ug Jay Navarra midonar og gold sa adult 3 event sa latin. Midugang og laing gold si Pabuaya sa teacher-student 1-3 event uban ni Romeo Jay Salve.
Sa Latin American event, naka-gold mao sila si John Paul Mocorro ug Mary Joy Dumosdog sa youth 3 latin, Jake Emmanuel Corro ug Anndreah Kiem Capangpangan sa junior 5; Bert Kevin Deluvio ug Jam Flores sa adult 4; Reil Nikki Jones Mangmang ug Isolde Mahilum sa corporate event; Charlie Camacho ug Marisse Reyes sa senior II-2, Crispin Sato ug Yeddah Castanares sa junior 3; ug Nino Salve ug Jannah Marie Valmoria sa juvenile 3 event. (BANAT NEWS)