Dragons nakaangkon og bahin sa liderato
CEBU, Philippines – Si Niño Belande miratsada og 23 points ug 18 ka rebounds aron pag-agak sa Supportsave Dragons ngadto sa 89-75 nga kadaugan batok sa Contact Solutions, 89-75 ubos sa Evo League sa 11th CSCC E-League men’s basketball tournament niadtong Domingo didto sa City Sports Club-Cebu gym.
Sila si Gerald Mari Baritua ug Germaine Jo Guarisma nagkumboya’g 35 puntos alang sa Dragons nga nakigsawo na karon sa liderato uban sa Telstra-Teletech Boomerangs sa managsamang 7-1 win-loss records.
Ang Dragons labaw lang og tres puntos sa unang kuwarter, 22-19, apan milusad kini og 23-11 rally aron pagpaburot sa ilang bentaha ngadto sa 15 puntos, 45-30 sa halftime.
Si Jerard de la Cerna mikamada’g 22 puntos alang sa Contact Solutions nga pabiling nangiwit uban sa 1&1 Marauders nga nakatilaw sab sa ikapito niining pilde sa walo ka duwa sa mga kamot sa Teletech Titans, 55-94.
Si Jonas Concepcion mitapos og 22 puntos, samtang sila si Jervis Pino Sildura ug Carlo Brylle Samson nagkumboya’g 37 puntos ug 33 ka rebounds alang sa Teletech nga mikulit sa ikaduha nilang daog batok sa unom ka pilde.
Sa lain pang mga duwa, ang Author Solutions, Inc. Hardbacks migamit sa balanse niining ataki aron pagmakmak sa 24/7 Cagers,99-84, samtang ang Calltek Trojans nagsandig nilang Patrick Jamlan ug Aerl Genebraldo aron pagpakaging sa The Results Companies Spartans, 71-60. (BANAT NEWS)
- Latest
