Junior Webmasters abante na sa semis
CEBU, Philippines – Mipabuhagay og 32 puntos si Froilan Mangubat, lakip ang mga mahinungdanong baskets didto sa fourth period aron palagputon ang University of Southern Philippines Foundation Baby Panthers, 87-76 ug ingon man moabante sa semifinals sa juniors division sa 15th Cebu Schools Athletic Foundation, Inc. (CESAFI) kagahapon didto sa Cebu Coliseum.
Ang third-ranked nga Junior Webmasters nakig-uban na sa Sacred Heart School-Ateneo de Cebu Magis Eagles ug sa University of San Carlos Baby Warriors sa semifinals. Ang katapusan luna sa semis ilogan pa sa twice-to-beat University of San Jose-Recoletos Baby Jaguars ug University of the Visayas Baby Lancers.
Tam-is ang maong kadaugan alang sa Junior Webmasters kay nakabawos kini human gilubong sa Baby Panthers, 68-93 sa ilang duwa niadtong Agosto 9.
Diriyot mokolapso ang UC didto sa fourth period diin duha ka higayon nga misikit ang Baby Panthers pinaagi ni Ain Obenza, ang sinaligang shooter sa Baby Panthers. Si Obenza miposa’g 27 puntos aron pangulohan ang natagak nga Baby Panthers, si Dennis Archival miamot og 16 puntos sa maong kapildihan.
Apan imbes nga makuratan, kalit sab mibawos ang Junior Webmasters og sagunson nuybe puntos gikan sa three-point play nilang Jason Florence Abejo ug Luigi Konrad Gabisan ug three-pointer ni Mangubat aron inaton ang labaw ngadto sa 70-60 sa nahabiling 5:45 sa duwa.
Misukli sab ang Baby Panthers og sunod-sunod nga 10 puntos aron mosikit pag-usab, 70-71, apan human sa ikaduhang rally sa Baby Panthers, wala na motugot pag-usab ang UC Juniors nga maapsan sila ilabi na kay gidominar na nilang Gabisan, Mangubat ug Abejo dili lang ang puntos, apan hasta sab ang rebounds.
Si Abejo ug John Bryll Cuyos nagkumboya’g 31 puntos alang sa Junior Webmasters.
Puntos matag usa
UC (87) – Mangubat 32, Abejo 16, Cuyos 15, Gabisan 9, Labrada 4, Malubay 3, Soco 2, Ecal 1.
USPF (76) – Obenza 27, Archival 16, Hernando 8, Justol 7, Macalam 6, Cometa 5, Peligrino 3, Lequin 3. (BANAT NEWS)
- Latest
