CEBU, Philippines – Nakaipsot ang San Mig Food Ave. sa kulbahinam nila nga duwa batok sa AMBL/Alexa Const., 86-84 sa As-Es B.A.R. 2nd Conference Fiesta Cup 2015 basketball tournament niadtong Agosto 31 didto sa Benjamin Solon Memorial Gym sa Cogon Ramos, Cebu City.
Unom ka players ang miiskor og double figures alang sa balanseng opensa sa San Mig Food Ave pinangulohan ni Hubart Sanchez, kinsa mipabuhagay og 14 puntos. Si Dexter Stella miamot og 13 puntos, gisundan ni Tikwil Cabañero nga adunay 12 puntos. Si Richard Molina mitampo’g 11 puntos, samtang sila si Louie Galon ug Art Arellano parehong miambit og 10 puntos alang sa San Mig Food Ave nga miabante og 20 puntos sa halftime, 53-33.
Hinuon mihiyos ang ilang labaw sa second half dihang ang AMBL (Alexa Const) mi-rally sa pagpangulo nilang Erwin Ferrer, kinsa mitapos sa duwa uban ang 18 puntos.
Laing nakahimo’g double digits alang sa AMBL (Alexa Const) mao silang Bagtong Miñoza ug Glenn Birao nga pulos miabuno’g 12 puntos ug si Kit Arellano nga adunay 10 puntos.
Sa main game, ang Boston miiskor sab og daog batok sa FTB, 102-95 ubos sa pagpangulo ni Julius Gastador sa iyang career-high 31 puntos.
Nakakuha sab siya og dakung suporta gikan nilang Jojo Talas ug Rey Arriola nga mitampo’g 27 ug 12 puntos matag usa.
Ang Boston maoy nikontrolar sa tibuok duwa diin miabante sila og siyete puntos paghuman sa unang 10 minutos sa duwa, 34-27. Miburot pa kini ngadto sa 58-46 sa halftime.
Si Aaron Miñoza miposa’g 26 puntos aron mangu sa FTB. Si Mama Ocampo mipabuto’g 22 puntos, samtang sila si Ivan Sabal ug Arvin Rodriguez parehong mitimbre’g 14 puntos.
Mihulga unta ang FTB sa hinapos nga bahin sa fourth period, apan wala mosalir ang ilang diskarte.
Puntos Matag Usa
Unang duwa:
San Mig Food Ave (86) – Sanchez 14, Stella 13, Cabañero 12, Molina 11, Galon 10, Arellano 10, Cabrera 6, Borres 4, Torres 2, Regidor 2, Cabantug 2.
AMBL (Alexa Const) – E. Ferrer 18, Miñoza 12, Birao 12, Arellano 10, Arias 9, Polar 9, Bontiao 4, Tiu 2, Rubi 2, Aliñabon 2, Iglesia 2, Ferrer 2.
Ikaduhang duwa:
Boston (102) – Gastador 31, Talas 27, Arriola 12, Jurado 9, Fuentes 8, Torrepalma 5, Luab 4, Ho 3, Jayme 3.
FTB (95) – Miñoza 26, Ocampo 22, Sabal 14, Rodriguez 14, Halaghoy 5, Melencion 4, Abrio 4, Bernal 4, Villaber 2. (BANAT NEWS)