Mga duwa karon (Cebu Coliseum)
5:15 pm --UC vs. UV (Srs.)
6:45 pm -- USC vs. USPF (Srs.)
CEBU, Philippines – Giharos sa Sacred Heart School-Ateneo de Cebu Magis Eagles ang ilang elimination round assignments pinaagi sa pagkulit og 8-0 sweep human nila gilubong ang Cebu Eastern College Dragons, 70-54 sa juniors division sa 15th Cebu Schools Athletic Foundation, Inc. (CESAFI) kagahapon didto sa Cebu Coliseum.
Si Errol Pastor mipabuto’g 17 puntos aron pangulohan ang Magis Eagles, kinsa mihimo’g 21-7 run sa first period. Nainat pa sa defending champion ang ilang labaw ngadto sa 19 puntos sa halftime, 36-17 nga nakapaluya sa Dragons, kinsa gipangulohan ni James Daniel Tempra sa iyang 20 puntos.
Bitbit ang perpektong 8-0 record, ang Magis Eagles miabante na sa semifinal round uban sa University of San Carlos Baby Warriors, kinsa miangkon sa ikaduhang dapit sa ilang 6-2 nga baraha human gipilde ang University of the Visayas Baby Lancers, 83-79.
Sa laing duwa, ang University of San Jose-Recoletos Baby Jaguars mipukan sa University of Southern Philippines Foundation Baby Panthers, 73-61 aron tapuson ang eliminasyon bitbit ang 5-3 nga baraha uban sa University of Cebu Junior Webmasters.
Ang Junior Webmasters maoy miangkon sa No. 3 spot pinaagi sa simple tie. Bisan pa niana, ang Junior Webmasters ug Baby Jaguars makabaton gihapon og twice-to-beat incentives batok sa Baby Panthers (4-4) ug Baby Lancers (4-4) sa quarterfinals sugod karong Martes. (BANAT NEWS)