CEBU, Philippines - Ang Sugbuanong basketbolista nga si Junemar Fajardo magpabilin sa poder sa San Miguel Beermen hangtod sa tuig 2018.
Si Fajardo, kinsa lumad gikan sa lungsod sa Pinamungajan gikatakda nang mopirma og dugang tulo ka tuig nga kontrata uban sa San Miguel franchise sa mosunod nga mga adlaw.
Matud pa ni Atty. Baldomero ‘Merong’ C. Estenzo, ang legal adviser ni Fajardo, nga segun sa nalatid sa kontrata, ang 6-foot-10 nga sentro modawat og labing taas nga suweldo nga gitagana sa PBA.
Gumikan kay ang labing daku nga suweldo karon sa usa ka player sa PBA nagkantidad man og P420,000 matag bulan, hayan nga si Fajardo mobulsa og dili momenus P15 milyones sa maong kasabotan.
Nagkanayon si Estenzo nga nagkasinabot nang daan ang San Miguel management ug si Fajardo kabahin sa paglugway sa iyang kontrata sa miagi pang adlaw, apan wala usa kini niya papirmaha gumikan kay gusto una nilang suknaon ang mga ginikanan niini kun uyon ba sila sa kontrata.
“Karon nga duna na’y blessings gikan sa iyang mga ginikanan, segurado nang mopirma si Fajardo sa kontrata sa umaabot nga mga adlaw labing dugay sunod semana,” sumala pa ni Estenzo, nga maoy naggiya sa karera ni Fajardo sukad sa pagpanikaysikay pa niini sa kolehiyo isip varsity sa University of Cebu Webmasters sa Cebu Schools Athletic Foundation, Inc. (CESAFI).
Sud sa tulo ka tuig niyang pro career, ang 25-anyos nga si Fajardo nakakulit dayon og pipila ka kasaysayan nga wala damha sa kadaghanan nga iyang makab-ot sa hamubo nga panahon. Human nahimong labing unang Sugbunaon nga miguwa isip No. 1 overall pick sa PBA Draft, si Fajardo mikulit pa og kasaysayan isip labing unang PBA player nga mihakot og duha ka sunod-sunod nga MVP sud sa 14 ka tuig.
Si Fajardo mihimo sab og impresyon sa Gilas Pilipinas nga mipakita og aksiyon sa FIBA World Cup sa miaging tuig didto sa Seville, Spain.
Ang iyang pagduwa sa national team nakadugang sa iyang pagsalig ug kompiyansa sa iyang kaugalingon nga nakahatag pa niya og dungog ugma damlag sa Philippine basketall.
Testamento niana, si Fajardo mitapos sa ikatulo niyang season pinaagi sa pagrehistro og solidong numero nga 17.4 puntos, 12.9 rebounds ug 1.7 blocks dayon na ngadto sa pagbira sa ikaduha niyang MVP award ingon man luna sa Mythical First Team ug All-Defensive team, duha ka Best Player awards ug Finals MVP sa Governor’s Cup.
Seguradong nindot ang pagbalik ni Fajardo kay makauban man sab niya ang iyang suod nga higala ug kanhi teammate nga si Brian Heruela, ang iyang katumpang sa pagtunol og duha ka sunod-sunod nga kampiyonato sa CESAFI niadtong tuig 2010 ug 2011.
Gikan sa Blackwater Elite diin siya mi-average og 10.58 puntos, 5.23 rebounds ug 4.88 assists matag duwa, si Heruela gi-trade ngadto sa Barako Bull Energy, nga milabay sab dayon kaniya sa San Miguel bugti ni Jeric Fortuna.