CEBU, Philippines – Sa tinguha nga makapakita og maayong labok sa umaabot nga PBA season, si Manny Pacquiao mopahigayon og subsob nga kampanya sa pre-season alang sa Mahindra Enforcers (kanhi Kia team) diin siya maoy playing coach.
Matud pa ni Mahindra team manager Eric Pineda, nga si Pacquiao malipayon kaayo sa pagdugang sa duha ka beteranong forwards nga sila si Nino Canaleta ug Aldrech Ramos aron magsilbeng lider sa ilang koponan sa ikaduha pa lamang nga tuig nilang pangindahay sa liga.
Sila si Canaleta ug Ramos nalandig sa Mahindra human gi-trade niini ang ilang No. 2 pick nga si Troy Rosario sa miaging PBA Draft ngadto sa Talk ‘N Text. Isip hulip, ang Tropang Texters mibuhi nilang Fil-Am Rob Reyes ug Kevin Alas.
Ang Enforcers mi-trade sab dayon ni Alas ngadto sa Road Warriors aron mabira silang Canaleta ug Ramos.
Gipalig-on sab sa Mahindra ang ilang frontline pinaagi sa pagkuha sa serbisyo nilang Paolo Hubalde ug Nard Pinto ug ingon man si JR Taganas, nga bag-o lang mipakita’g impresiyon sa iyang dinuwaan uban sa AMA University Titans sa katapusang season sa PBA D-League.
Nagkanayon si Pineda nga ang Enforcers molarga karong Huwebes sa General Santos City aron mosalmot sa usa ka pocket tournament nga giorganisar mismo ni Pacquiao. Lain pang mosalmot mao ang GlobalPort, Blackwater ug duha ka commercial teams gikan sa Davao.
Ang makampiyon sa maong torneyo modawat og P500,000, samtang ang mopahiluna sa ikaduha ug ikatulong dapit mobulsa’g P300,000 ug P200,000. (BANAT NEWS)