Kenyans, Sorongon nanghawod sa Naga 21K Uphill Rush

CEBU, Philippines – Ang Kenyan nga si Joseph Mururi ug si Ruffa Sorongon maoy naghari sa tagsa-tagsa nila ka mga kategoriya sa makutas nga Naga 21K Uphill Rush kagahapon didto sa dakbayan sa Naga habagatang bahin sa Sugbu.

Si Mururi, nga maoy midominar sa Talisay City Marathon duha ka semana pa lamang ang milabay, mipukan ni Michael Largo aron pagsakmit sa titulo sa men's division, samtang ang garbo sa taga Naga nga si Bonifacio Monjas mipahiluna sa ikatulong dapit bisan og duna kini cramps.

Sa women's class, si Sorongon maoy mibira sa korona human gilupig si Saralee Cuizon. Ang kanhi tadhan nga triathlete nga si Amale Mendezona-Jopson maoy nalandig sa ikatulong puwesto.

Sa men's 12K, laing Kenyan nga si Kilimo Cheruiyot maoy misakmit sa kampiyonato. Si Chobie Duenas maoy na-2nd ug gisundan kini ni Elmer Bartolo.

Ang top 3 sa women's 12K mao sila si Cherry Andrin, Michelle Beboso, ug Hazel Busa.

Si Prince Joey Lee, nga mihakot og tulo ka bulawang medalya sa CESAFI athletics event, maoy mipatigbabaw sa men's 5K ug nagsunod kaniya mao sila si Robert Daang ug Florendo Lapiz.

Samtang sa women's 5K, mipatong sa nag-unang tulo ka puwesto mao sila si Wendelyn Tampos Tecson, Lovely Fe Andrin ug Mary Denzyll Gionzon.

Gi-organisa sa Team Kombati, usa ka kahugpungoan sa mga mahilig og dagan, ang maong kalihukan kabahin sa ikawalo nga anibersaryo sa Charter Day sa dakbayan sa Naga. (BANAT NEWS)