USC, USJ-R magtigi sa CESAFI boys volleyball final
CEBU, Philippines - Ang University of San Carlos ug ang University of San Jose-Recoletos mipakgang sa tagsa-tagsa nila ka mga kontra aron pag-angkon og katungod nga maoy magsangka sa kampiyonato sa secondary boy’s volleyball event sa 2015 Cebu Schools Athletic Foundation, Inc. season kagahapon didto sa USJ-R Basak Campus gym.
Ang USC spikers mipaduol ngadto sa usa na lang ka tikang aron hingpit nga madepensaan ang ilang titulo human gipakaging ang Don Bosco Technology Center, 25-12, 25-15, samtang ang USJ-R mipakurat sa University of Southern Philippines Foundation sa kulbahinam nga tulo ka sets, 21-25,25-17, 25-23 aron pagsakmit sa katapusang luna sa finals.
Ang USC ug USJ-R magtigi sa korona karong Oktubre 10 sa wa pa’y hisayring binyu.
Sa secondary football nga didto giduwa sa Cebu City Sports Center, ang Sacred Heart School-Ateneo de Cebu mimakmak sa defending champion Don Bosco booters, 1-0.
Si Joshua Shields maoy milansang sa winning goal sa SHS-Ateneo sa nakaon nga 18 minutos sa duwa.
Gumikan niini, ang SHS-AdC nagsolo na karon sa liderato bitbit ang baraha nga 2-0, samtang ang DBTC nanaog sa ikaduhang puwesto dala ang 2-1 win-loss record sama sa University of San Carlos-BED nga mitali sa ikaduha nilang daog human gilampurnas ang USJ-R, 5-0.
Sa taekwondo, ang USC maoy naghari sa seniors division human mikabkab og 15 ka gold, upat ka silver, ug usa ka bronze medals. Ang University of Cebu maoy nahimutang sa ikaduha sa ilang 5-14-3 gold-silver-bronze nga medalya, samtang ang USJ-R maoy mikapyot sa ikatulong puwesto bitbit ang 3-3-2 medal tally. (BANAT NEWS)
- Latest
