CEBU, Philippines - Sa lain na usab nga makasaysayanong hitabo sa Philippine boxing, ang ALA Promotions International inabagan sa ABS-CBN Sports mopasiugda sa labing una nilang Pinoy Pride event didto sa Amerika karong Oktubre 17.
Si ALA Promotions President ug CEO Michael Aldeguer mikompirma nga si Donnie ‘Ahas’ Nietes, ang longest reigning Filipino world boxing champion maoy mobida sa main event sa maong higanteng promosyon nga adto ipahigayon sa StubHub Center sa Carson City, California.
Mopakita sab sa ilang abilidad sa “Pinoy Pride 33: Filipinos Contra Latinos” mao ang managsuong ‘Prince’ Albert ug Jason ‘El Niño’ Pagara ug ang sumusulbong nga bitoon sa ALA Stable nga si Mark ‘Magnifico’ Magsayo.
Pulos sila nagmadaugon sa miagi nilang mga away.
Ang 33-anyos nga si Nietes (36-1-4, 21KOs) mikulit og 12-round ‘unanimous decision’ nga daog batok ni Francisco Rodriguez Jr. aron madepensaan ang iyang WBO light flyweight title niadtong Hulyo 11 diha sa Waterfront Cebu City Hotel and Casino.
Sa susamang card, si Magsayo mihimo og impresyon human gipatikangkang ang Mehikanong si Rafael Reyes sa ikalimang hugna aron pag-inat sa way tatsa niyang rekord ngadto sa 11-0 uban ang 9KOs.
Samtang ang managsuong Pagara mihimo sab og managlahing kalampusan atol sa “Duel in Dubai 2” ning buwana didto sa Dubai World Trade Center sa Dubai, United Arab Emirates.
Si Albert Pagara mitapos sa overweight niyang Mexican challenger nga si Jesus ‘Chito’ Rios sud lamang sa duha ka minutos aron pagpanalipod sa iyang IBF Intercontinental super bantamweight belt ug ingon man pag-inat sa nagkadina niyang daog ngadto sa 24-0 uban ang 17KOs.
Sa iyang bahin, si Jason Pagara, ang kasamtangang WBO International light welterweight champion, nakasugakod human magisii sa wala niyang kilay sa unang hugna dayon na ngadto sa pagbuntog ni Ramiro Alcaraz pinaagi sa technical decision sa ikawalong hugna.
Ang ALA Promotions ug ABS-CBN Sports pormal nga molusad sa labing una nilang Pinoy Pride event sa Amerika karong Lunes sa hapon diha sa Montebello Villa Hotel.