CEBU, Philippines – Ang Lexmark Stallions mibuntog sa Convergys Blue Devils, 57-51, samtang ang Kyocera Frontiers mipakugang sa kanhi wa’y pildeng Supportsave Dragons, 72-67 sa 11th CSCC E-League men’s basketball tournament niadtong Domingo didto sa City Sports Club-Cebu gym.
Si Franco Angelo Cipriano miratsada og 16 puntos, 14 ka rebounds, unom ka steals ug unom ka blocks alang sa Lexmark. Si Sylvester Millevo midugang og 13 puntos, samtang si Ralph Loren Martinez mitampo’g 12 puntos alang sa Stallions nga pabiling nagsolo sa liderato sa Elite Classic sa ilang 5-0 record.
Si Oscar Villamor Jr. adunay 15 puntos ug 11 ka rebounds alang sa Blue Devils nga misukarap sa ikalima nilang sunod-sunod nga pilde.
Sa ilang bahin, ang Kyocera mibihag sa inilog nga Supporsave bisan og pito lamang ka mga players niini ang nakaduwa. Salamat sa pagmangtas ni Ariel Ramonito Edera, nga mihipos og 18 sa iyang 23 puntos sa final half nga maoy nagtuboy kanila ngadto sa kadaugan.
Ang Kyocera alkansi og otso puntos human sa tulo ka kuwarter, 49-57, apan gipakuratan niini ang Supportsave pinaagi sa ilang 23-10 rally sa katapusang hunat sa duwa.
Si Eduardo Tuico Jr. mitapos og 15 puntos, samtang si Winston Stephen Panal midugang og 12 puntos alang sa Kyocera nga nagsolo sa ikaduhang puwesto sa Evo League bitbit ang 6-1 record.
Si Niño Belande mipatuasik og 26 puntos ug 17 ka rebounds apan nakawang ang iyang paningkamot kay ang Supportsave nakatilaw sa labing una niining pilde human mikulit og lima ka sunod-sunod nga daog.
Sa laing mga duwa, ang Teleperformance All-Stars mipakaging sa ePerformax Reds, 80-61, samtang ang Author Solutions Hardbacks mipukan sa 1&1 Marauders, 58-53. (BANAT NEWS)