CEBU, Philippines – Ang Telstra-Teletech Boomerangs ug Supportsave Dragons milangkat sa ikalima nilang sunod-sunod nga kadaogan ubos sa Evo League sa 11th CSCC E-League men's basketball tournament niadtong Sabado didto sa City Sports Club-Cebu gym.
Si kanhi University of San Carlos Warrior Sam Jordan Hermosa miposa og 23 puntos uban ang 11 ka rebounds, unom ka blocks ug upat ka steals aron pagtuboy sa Telstra ngadto sa 82-62 nga demolisyon sa Calltek Trojans, samtang si ex-Southwestern University Cobra Niño Belande mipatuasik og 29 puntos uban ang 14 ka rebounds sa 95-72 nga pagkulata sa Supportsave sa 24/7 Cagers.
Sila si Nicklaus Sison, Ivan Figuera, ug Jaygard Vios mitampo og tagsa ka dosenang puntos alang sa Telstra, nga maoy mikontrolar sa duwa human nakalabaw og otso puntos, 25-17, sa unang kuwarter. Ilang gitiwasan og kulata ang Calltek human milusad og 21-9 run sa ikatulong kuwarter.
Sa iyang bahin, si Belande nakaangkon og igong suporta ni Mark Vergara nga mikimada og 17 puntos, pito ka assists ug lima ka steals. Si Adrian Neilburn Dy miamot og 16 puntos ug 10 ka rebounds alang sa Supportsave, nga mipabuto og 52-25 nga bomba aron pagpakaging sa 24/7.
Sa laing mga duwa, ang Teleperformance All-Stars nimakmak sa SSI Warriors, 89-62, samtang ang Kyocera Frontiers milampurnas sa Contact Solutions, 68-51.
Si Dean Junber Escalon mipuntos og 13, samtang sila si Gamaliel Bas ug James Lester Navaja nagkumboya og 21 puntos ug 20 ka rebounds alang sa Teleperformance, nga nagbitbit na karon og 4-1 win-loss record. — EBV (BANAT NEWS)