CEBU, Philippines - Nasakmit sa Sacred Heart School-Ateneo de Cebu Magis Eagles ang solong liderato human ilang gibihag ang University of the Visayas Baby Lancers, 73-64 sa 15th Cebu Schools Athletic Foundation, Inc. (CESAFI) didto sa Cebu Coliseum.
Si Andrew Velasco maoy nangu sa Magis Eagles sa iyang 22 puntos, duha ka rebounds ug duha sab ka assists aron mahimong best player of the ballgame.
Miarangkada dayon ang Magis Eagles pagsugod aron moposte og 13 puntos nga bentaha paghuman sa first quarter sa iskor nga 21-8.
Ang Magis Eagles nga walay katagbawan miinat sa ilang labaw ngadto sa 17 puntos, 56-39 sa third period nga nakahatag og problema sa Baby Lancers, kansang bugtong konsuylo mao lang ang pagsikit og nuybe puntos pagtapos sa duwa.
Grabe unta ang paningkamot ni Raul ‘Jancork’ Cabahug, kinsa maoy nangu sa Baby Lancers sa iyang 31 puntos, apan wala kaayo makaamot og daku ang uban niyang teammates.
Sa laing mga duwa, ang University of Southern Philippines Foundation Baby Panthers milubong sa Don Bosco Technology Center Junior Greywolves, 71-40, samtang ang University of Cebu Junior Webmasters miihaw sa Cebu Institute of Technology-University Wildkittens, 83-64.
Si Froilan Mangubat maoy nangu sa UC sa iyang 26 puntos, sila si Luigi Konrad Gabisan ug Jason Florence Abejo mitampo’g 14 ug 10 puntos, matag usa.
Ang Wildkittens gipangulohan sab ni Jasper Berezo sa iyang 26 puntos.
Karong hapon, ang UV Green Lancers tuyo nga mokulit og 4-0 nga baraha dihang ilang ikasangka ang USPF Panthers.
Ang duwa sugdan sa alas-4 sa hapon.
Human sa UV-USPF showdown, ang defending champion Southwestern University-Phinma Education Cobras tinguha sab nga moinat sa ilang daog human mapilde ngadto sa University of San Carlos Warriors sa season-opening sa ilang pakigsangka batok sa University of San Jose-Recoletos Jaguars sa alas-5:30 sa hapon. (BANAT NEWS)