Leylam FC kampiyon sa 17th Aboitiz Cup

CEBU, Philippines -  Ang Nigerian booter nga si Abdulmalik Ismael maoy nahimong bayani sa    Leylam FC pagbuntog sa ERCO BRO Nationals, 1-0, aron pagsakmit sa kampiyonato sa men’s open division sa 17th Aboitiz Football Cup niadtong Huwebes sa gabii diha sa Cebu City Sports Center.

Tam-is kaayo ang maong panimalos nga nakab-ot sa Leylam FC ni coach Oliver Colina gumikan kay gipakaging man sab sila sa ERCO-UC, 4-1 sa finals sa miaging tuig.

Niadtong tungora, si Abdulmalik didto pa sab nagduwa uban sa ERCO team.

Karon nga mitabok siya sa laing poder, giseguro ni Abdulmalik nga mohimo na sab siya og dili mahikalimtang  marka.

Human walay nakapuntos sa duha ka habig  pagtapos sa first half, kalit lang nga gipakuratan ni Abdulmalik ang mga batos sa ERCO gumikan  kay mura’g kilat  kapaspas ang gipasud niyang goal sa ika-69 nga minutos nga maoy nagtuboy sa Leylam ngadto sa kadaugan. 

“I prayed to God to give me extra strength. I said, if you give me the strength, I will do my best,” matud pa ni Abdulmalik nga maoy napiling Most Valuable Player.

Triple nga selebrasyon ang natagamtaman sa Leylam gumikan kay si Alex Buanghog maoy gipasidunggan sa Cebu Football Association(CFA) isip best goal keeper ug si Jose Mari Demecillo isip best defender.

Duna hinuo’y konsolasyon ang ERCO BRO gumikan kay si Meleke Stephane maoy gibayaw nga best midfielder ug si Jade Paghubasan maoy best striker human milansang og kinatibuk-ang siyam ka goals sa torneyo. (BANAT NEWS)