CEBU, Philippines - Ikaduhang sunod-sunod nga daog maoy tuyo sa Southwestern University Cobras sa ilang pakigsangka batok sa University of Southern Philippines Foundation Panthers sa 15th Cebu Schools Athletic Foundation, Inc. (CESAFI) men’s basketball tournament karong adlawa diha sa Cebu Coliseum.
Lahi sa miaging season diin sila ang dominanteng puwersa, ang Cobras mao na karon ang ‘underdog’ ning higayona nga moduwa nga walay import sa siyam ka players sa ilang line-up.
Bisan og piangon, dili gihapon angay nga kompiyansaan ang Cobras kay gawas nga defending champion, anaa usab uban kanila ang duha ka banggiitang mga coaches nga sila si Raul ‘Yayoy’ Alcoseba ug Mike Reyes.
Dili ikalimod nga ang Cobras motabok og pito ka lawod sa ilang pagdepensa sa korona.
Gani sa ilang miaging duwa, ang Cobras naglisud pagkulit sa ilang unang daog batok sa Cebu Institute of Technology-University Wildcats, 69-64 niadtong Sabado.
Ang Cobras-Panthers showdown sugdan sa alas-6:45 sa gabii human sa duwa tali sa University of the Visayas Baby Lancers ug Don Bosco Technology Center Greywolves nga magsangka sa alas-5:15 sa hapon.
Sa gihapon, ang Cobras magsalig nilang Mark Jayven Tallo, Jovanie Luz, Melvin Holper, Jesse Bautista, Jan Michael Auditor ug Anton Pardo ug uban pa.
Ang Panthers magsandig sab nilang Dan Dexter Silorio, Kino Mathews Bajamunde, Brantford Borces, Jayson Cando, Lyndon Colina ug John Alocillo (BANAT NEWS)