CEBU, Philippines - Ang dugay nang gipaabot nga sangka sa kampiyonato tali sa defending champion ERCO BRO Gau ug Leylam FC sa men’s open division sa 17th Aboitiz Football Cup mahitabo na karong alas-7 sa gabii diha sa Cebu City Sports Center.
Ang duwa orihinal nga gitakda niadtong Hunyo 28, apan gikanselar kini gumikan sa dili kasarangan nga panahon, inubanan pa sa makusog nga pagbunok sa uwan. Ang Cebu Football Association wala dayon makahimo og iskedyul sa final nga duwa kay dugay man sab nga nagkasinabot ang duha ka koponan kun kanus-a sila parehong bakante.
Karon nga miabot na ang takna nga sila magtakus, ang duha ka mga coaches pulos nagdumili pagpadayag sa ilang tsansa nga maoy mokabi sa korona.
Si ERCO head coach Glen Ramos nagkanayon nga ang presensiya sa ilang Manila-based players nga silang kanhi Philippine Azkals team captain Chieffy Caligdong, Ian Araneta, Ronnie Aguisanda, Mark Ferrer ug Dodong Villareal dili garantiya nga hingpit nilang madepensaan ang ilang titulo. Kini gumikan kay ang uban nilang regular players apil na ang ilang Nigerian recruits wala na man sa ilang team.
Sa habig sa Leylam FC, si coach Oliver Colina miingon nga bisan og hitsas ang ilang line-up, dehado gihapon sila gumikan kay ang uban kanila wala sa maayong kondisyon, samtang ang uban nagpaalim sa ilang injury. (BANAT NEWS)