CEBU, Philippines – Ang Teleperformance All-Stars mipakgang sa Accenture Sharks, 91-81 sa labing unang overtime game ubos sa Elite Classic sa 11th CSCC E-League men’s basketball tournament niadtong Sabado didto sa City Sports Club-Cebu gym.
Sa dihang naglabaw ang Teleperformance og tres puntos, 74-71, sa nahabilin nga 4.9 segundos sa regulasyon, ang Accenture duna unta’y tsansa nga modaog sa dihang gi-foul si Archie Batua human milansang og 3-pointer aron pagtabla sa iskor, 74-all. Apan wala masud ni Batua ang iyang foul throw hinungdan sa overtime.
Seguradong nanglipagho si Batua ug sa Accenture sa maong sipyat gumikan kay nabuhian man og dugo ang Teleperformance aron pagdominar sa dugang singko minutos sa duwa gamit ang 17-7 run.
Si Dean Junber Escalon mitapos og 19 puntos alang sa Teleperformance, si Ryan Veloso miamot og 17 puntos, samtang sila si Cecilio Sam, Jr. ug Kevin Clark Navaja nagkumboya’g 23 puntos.
Si Batua miratsada og season-high 27 puntos uban ang pito ka steals ug lima ka rebounds, samtang si Ildefonso Bulangis Jr. miposa og 23 puntos, apan nakawang ang ilang paningkamot sa habig sa Accenture.
Sa Evo League, ang Telstra-Teletech Boomerangs ug Supportsave Dragons parehong minglayat ngadto sa ikaupat nilang sunod-sunod nga kadaugan.
Si Jaygard Vios mipabuto og 19 puntos aron pagtuboy sa Telstra ngadto sa 73-66 nga kadaugan batok sa Contact Solutions, samtang si Niño Belande mipatuasik og 30 puntos ug milangkat og 19 ka rebounds aron pag-aswat sa Supportsave ngadto sa 80-55 nga demolisyon batok sa 1&1 Marauders. (BANAT NEWS)