Literal nga nasamdan ang kasing-kasing sa tibuok nasudnong Pilipinhon human pakyas ang Pilipinas sa gitinguha niini nga mo-host sa 2019 FIBA World Cup sa dihang ang higanteng China maoy opisyal nga gihatagan sa tahas pagpadagan sa labing prestihiyoso nga torneyo sa basketbol sa tibuok kalibotan upat ka tuig gikan karon.
Mismo ang mga kadagkoan sa FIBA Central Board ang miluwat sa maong desisyon human sa komprehensibo ug makuti nga presentasyon nga milanat og tag 29 minutos tali sa duha ka kampo kagahapong adlawa didto sa Tokyo, Japan.
Ang delegasyon sa Pilipinas nga gipangulohan ni sports patron ug Samahang Basketbol ng Pilipinas (SBP) President Manny V. Pangilinan midala nilang boxing legend Manny Pacquiao ug Hollywood actor Lou Diamond Philips sa tinguha nga kumbinsihon ang liderato sa FIBA nga sila maoy hatagan og katungod nga mopadagan sa nailhan sab nga World Basketball Championships.
Samtang sa habig sa China ilang gitabil ang kanhi NBA superstar nga si Yao Ming aron palig-onon ang ilang kawsa nga maoy mo-host sa kompetisyon nga mahitabo kausa lamang sa upat ka tuig. Gani nagtimbaya pa silang Pacquiao ug si Yao Ming pipila ka minuto sa wala pa gianunsiyo sa FIBA ang hukom niini. Makita sa hulagway nga si Yao Ming nagsul-ot og boxing gloves, samtang nagkupot og bola si Pacquiao.
Atol sa presentasyon, gibandiwag sa Pilipinas ang kasingkasing niini nga tinuod nagpangga sa basektbol, nga giyukboan sa minilyon ka mga Pinoy isip usa ka relihiyon. Gipakita sa hamubo nilang ‘video clip’ ang grabeng pag-abiba ug suporta ingon man ang dili hitupngan nga popularidad sa basketbol dinhi sa nasud.
Gibida sab sa Pilipinas ang posibleng mga binyu sa duwa kun ugaling anhi dinhi sa nasud mahitabo ang giilang inahan sa tanang basketball competition dinhi sa planeta. Apil na niini ang Philippine Arena sa Bulacan nga makapasud og dili momenus sa 52,00 ka tawo, ug ang tukoronon pa nga world-class seaside arena sa SM dinhi sa Sugbo diha sa South Road Properties (SRP).
Gibandila sab sa Pilipinas ang grabe nga pagkahilig sa mga Pinoy sa social media nga daku og ikaambag aron mapalapdan ang kasikat sa maong matang sa paugnat sa kusog sa bisan asang suok sa kalibotan.
Samtang ang China mapasigarbuhong mipasundayag sa ilang inprastruktura ug sa halapad nilang kasinatian bugti sa pipila na ka higayon nilang pag-host og mga dagkung kalihukan sa sports apil na niini ang 2008 Beijing Olympics, ang 2010 Asian Games ug ang Youth Olympics niadto lamang miaging tuig. Upat ka mahinungdanong elemento ang gibasihan sa FIBA Central Board pagpili kun kinsa’y angayan mo-host sa maong torneyo. Una ang klarong tumong ug konsepto, eksperyensiya pag-host og international events, kasaysayan sa basketbol sa nasud ug ang mga siyudad ug binyu.
Klaro kaayo sa tapad nga ang China nakapabor og daku batok sa Pilipinas kun kasinatian, binyu ug imprastruktura maoy hisgutan nga lagmit maoy gihatagan og gibug-aton sa FIBA Central Board.
Mao kini ang labing unang higayon nga ang China nga 15 ka higayon nga nahimong Asian basketball champion, mo-host sa FIBA Worlds. Samtang ang una ug bugtong higayon nga nakapadagan ang nasud sa maong matang sa higanteng torneyo niadto pang tuig 1978.