CEBU, Philippines – Naglumpayat sa kalipay ang Brgy. Opao human ilang nabihag ang mas tag-as ug lig-on nga Brgy. Centro, 60-57 sa kulbahinam nilang duwa sa finals aron masakmit ang titulo sa 4th Vice Mayor Glenn Bercede 40-above Inter-barangay basketball tournament niadtong Domingo sa gabii didto sa Mandaue City Cultural and Sports Complex.
Ang Opao ni coach Marlon Cantillep ug Danilo Gepega Jr. nagsalig sa ilang fourth quarter rally sa pagpangulo nilang Warren Baunsit ug Felix Duhig nga nagkumboya’g 27 aron ilogon ang labaw sa labing unang higayon, 51-50.
Human niadto, wala na motugot pa ang Opao nga mailog pagbalik sa Brgy. Centro ang labaw.
Si Baunsit mipatuasik og 16 puntos nga igo na kaayo alang kaniya aron ilhon isip MVP, samtang si Duhig mitimang og 11 puntos, lakip ang iyang krusyal nga three-point shot nga nakapabuhi og balik sa Brgy. Opao dihang misikit kini,46-48 human mabiyai’g singko puntos sa tunga-tungang bahin sa fourth period.
Si Tawing Grafe mao lang ang bugtong nakahimo’g double figures alang sa Brgy. Centro nga mipabuhagay og 13 puntos, apil na ang nagkadinang 11 puntos sa first period aron hatagan ang koponan og 25-10 nga bentaha sa nahabiling 6:10 sa maong kuwarter.
Sa sayo pa, ang Ibabao Estancia midemolis sa Casuntingan, 66-49 aron maangkon ang ikatulong puwesto.
Ang Ibabao-Estancia nga maoy nikontrolar sa duwa gipangulohan ni Raul Reyes, kinsa miiskor og 15 puntos, gisundan ni Jory Casal sa iyang 12 puntos. Sila si Noniel Soco ug Arnel Manatad miabuno’g 10 puntos matag usa alang sa Ibabao-Estancia ni coach Nathaniel ‘Dodong’ Quilab.
Gipangulohan sab ni Ritchie Banluta ang Casuntingan pinaagi sa iyang 16 puntos. Si Arnold Pestaño miamot og 13 puntos lakip ang tulo ka three-pointers alang sa Casuntingan nilang coach Kenneth Cortes, Wading Monsanto ug Boki.
Si Mandaue City Vice Mayor Glenn O. Bercede ug city councilor Dadie Suico maoy mitunol sa mga premyo ngadto sa mga mananaog.
Sa iyang mubo nga mensahe, si VM Bercede mihatag sa iyang daku nga pasalamat ngadto sa mga teams nga miapil, ilabi na sa niduwa sa championships nga bisan pa sa kapisikal sa duwa nagmalinawon ug nagmalampuson gihapon.
Puntos Matag Usa
Unang duwa:
IBABAO-ESTANCIA (66) – Reyes 15, Casal 12, Soco 10, Manatad 10, Patindol 8, Villamor 3, Gonzales 2, Ceniza 2, Armenion 2, G. Villamor 2.
CASUNTINGAN (49) – Banluta 16, A. Pestaño 13, Brocal 5, Pielago 4, S. Pestaño 2, Ramos 2, Cinco 2, Cabatingan 2, Magale 2, Sadili 1.
Ikaduhang duwa:
OPAO (60) – W. Baunsit 16, Duhig 11, Diton 6, Puno 4, Aldimer 4, E. Baunsit 4, E. Duhig 3, Mit. Entrampas 3, Peñaranda 2, Maramara 2, Mic. Entrampas 2, Regudo 2, A. Baunsit 1.
CENTRO (57) – T. Grafe 11, Singson 8, Latonio 7, Apa 6, Siarot 6, D. Grafe 6, Pepito 5, Ygot 4, Gulbin 2, Nadera 2, Carba 1. (BANAT NEWS)