CEBU, Philippines - Lima ka players ang napamatud-an nga miusab o mi-tamper sa ilang birth certificates sa NSO nga karon Philippine Statistics Agency (PSA), ang gipapauli didto sa Mindanao human gitangtang ang ilang scholarship sa administrasyon sa Southwestern University (SWU)
Ang lima nga nakapaukay sa Cebu Schools Athletic Foundation, Inc. (CESAFI) mao silang Elber dela Cerna Catinggan, Renlado Obarco Jr., Mark Anthony Quilab, Andy Jone Turno ug Edwin Abo-abo nga pulos taga Mindanao nga moduwa unta sa Southwestern high school team, apan nasakpan nga midoktor sa ilang mga birth certificates.
Ang nahisgutang mga players gipahamtangan sab og “lifetime ban” gikan sa administrasyon sa SWU. Naanugnan unta ang SWU tungod kay pulos maayo ang mga players ug adunay gitas-on nga 6’3 ngadto sa 6’4.
Matud pa ni SWU legal officer Atty. Godwin Manguinsay nga ang laing upat ka players nga gipailawom pa sa imbestigasyon, dili na sab nila dawaton tungod kay bisan pa og mamatud-an sila nga inosente, aduna na’y mansa ang ilang pagkatawo.
Apil sa gipahamtangan og “lifetime ban” mao ang coach ug kanhi SWU Cobras nga si Rey Lubgoban, kinsa maoy nagdala sa mga rekord gikan sa Cagayan de Oro nga pulos gipang-usab.
Si Lubgoban nga taga Mindanao duha pa lang ka bulan nga mi-coach sa SWU Baby Cobras.
Matud pa ni Manguinsay nga mosalmot gihapon sila sa sunod tuig ug ilang paningkamotan nga makakuha sila'g maayong mga players.
Mao unta kadto ang unang season sa Baby Cobras sa CESAFI. Katapusan silang misalmot niadtong 2000 nga giila pa sa ngan CAAA diin sila maoy kampiyon ug pipila sa ilang mga players mao silang Maynard Padilla ug Elmer dela Cruz.
Atol sa usa ka press conference kagahapon, si Atty. Manguinsay nagkanayon “had we know about it, (the tampering of records), we don’t bother to submit their documents.”
“Hapit mi mangatagak sa lingkoranan. We we’re so embarrassed. We’re so ashamed,” matud pa ni Atty. Manguinsay dihang gipangutana siya kun unsa’y unang reaksiyon dihang migawas sa pamantalaan ang maong isyu.
Ang chairman of the board sa SWU nga si Dr. Chito B. Salazar miluwat og mensahe kalabot sa maong hitabo nga nag-ingon: “On behalf of Southwestern University, I would like to apologized to CESAFI and to the public for this incident. Rest assured, we will investigate this problem and we will act accordingly.”
“We will endeavor to clean up our athletics program and make sure that there are no more incidents of inappropriate behavior of unethical practices, falsification, extortion or corruption.”
“For Phinma education, integrity and professionalism are core values.”
“Please give us some time to get our acts together and please let us know if you are aware of any other problems.” (BANAT PALARO)