CEBU, Philippines – Gironda sa PNP Basak ang kampo sa Pulpogan Motorparts ug ila nga nasakmit ang 67-61 nga kadaugan sa 5th Consolacion Barkadahan Basketball League (CBBL) tournament niadtong Lunes sa gabii didto sa Brgy. Pulpogan gym, Consolacion.
Si Junry Villacarlos maoy nangu sa operasyon sa PNP Basak ug nakakuha kini og 19 puntos. Giabagan sab siya ni Andy Eyas, kinsa mipabuto og 18 puntos.
Bugtong si Erik Pagodon lang ang mihimo’g double digits alang sa naparot nga Pulpogan Motorparts nga miariya og 24 puntos.
Sa laing duwa, ang Verdida Ricky nakatilaw na gyud og daog dihang ilang gipilde ang CMWD Water, 73-63.
Mismo ang team owner nga si Ricky Verdida ang nangunay sa pagpangulo sa iyang team pinaagi sa iyang 20 puntos. Sila si Junjie Loyola ug Julius Timkang parehong mikulit og 12 puntos, samtang si Nador Bacalla mitampo’g 10 puntos.
Lima unta ka players ang nakaiskor og double figures alang sa CMWD Water, apan wala sila makapiog sa katakus sa Verdida Ricky.
Si Benjie Canales miposa’g 14 puntos, gisundan ni Gabilan sa iyang 12 puntos, si Enting Matugas miabuno’g 11 puntos, samtang sila si I. Sobrado ug R. Maraguinot adunay 10 puntos matag usa.
Ang 5th CBBL gipaluyohan sa Orlmon Video, Malonjao Pharmacy, Lyric’s Internet Cafe, Danny Encabo newstand ug ni Brgy. Pulpogan councilor Avelino Bihag.
Ang mga duwa gipadagan ni league commissioner Eduard Escorial inabagan nilang Noel Calo, Changchang Tejero ug Kenneth Tagalog sa CEBRA.
Puntos Matag Usa
Unang duwa:
PNP BASAK (67) – Villacarlos 19, Eyas 18, Lagando 9, J. Demecillo 9, Ares 7, I. Demecillo 5.
PULPOGAN MOTORPARTS (61) – E. Pagodon 24, Yamelo 8, Pestaño 6, Bangcal 5, F. Pagodon 5, Personal 4, Camay 3, Ibale 3, Lacton 2.
Ikaduhang duwa:
VERDIDA RICKY (73) – Verdida 20, Loyola 12, Timkang 12, Bacalla 10, Inot 6, Miñoza 6, Frasco 4, Yaun 2, Galo 1.
CMWD WATER (63) – Canales 14, Gabilan 12, Matugas 11, Sobrado 10, Maraguinot 10, Crystal 4, Goco 2. (BANAT NEWS)