“Rider of the Year” koronahan karon

CEBU, Philippines - Kinsa ang pasidunggan nga  ‘Rider of the Year’ maoy gikahinaman nga masayran sa MS Motosuit Motocross Series Annual Awards nga gitakda karong gabii diha sa Teatro Casino sa Waterfront Cebu City Hotel and Casino sa Barangay Lahug, ning dakbayan.

Ang modaog sa maong gitawag nga ‘mother of all awards’ pormal nga inanunsiyo ni race organizer ug MS Motosuit big boss Lou Ornopia sa naghinapos nga bahin sa programa nga sugdan sa alas-7 sa gabii.

“Mao na sab kini ang panahon nga atong hatagan og pasidungog ang atong mga riders dili lamang sa maayo nilang performance sa miaging tuig, apan gumikan sab sa daku nilang natampo nga nagpabiling buhi ug sadya ang motocross dinhi sa Sugbo,” matud pa ni Ornopia.

Mangu sa listahan sa mga awardees mao ang double champions nga sila si Jubenile Abellar, Roscel Gungob ug Jed Luna. Si Abellar maoy overall champion sa pro ug expert open categories, si Gungob miharos sa executive A ug B titles, samtang si Luna maoy naghari sa open enduro ug beginners open production.

Dungan kanila nga ibayaw sa bantawan sa kadungganan mao sila si John Flores (intermediate), BJ Pepito (65cc), Keith Lloyd Abrenica (mini class 65cc), Alex Abalo (local enduro), JP Cuesta (beginners open production), Jonathan Cuyos (executive C)ug JayR Gualiza (underbone).

Silang tanan pulos kandidato  alang sa karera sa ‘Rider of the Year’.

Sa 2014 nga edisyon sa tinuig niyang lumba, si Ornopia nakapahigayon og unom ka legs. Ang riders nga makatali sa kinatas-ang puntos maoy ilhon nga ROY kon kampiyon sa mga kampiyon.

Sa laing bahin, si bokal Joven Mondigo sa ikaupat nga distrito sa Sugbo maoy pinasidunggang dinapit ug mamumulong sa maong kalihukan. Pormal siyang ipaila-ila ni Madam Richell P. Pestañas, usa ka retiradong education program supervisor nga kasamtangang administrator sa usa ka pribadong tunghaan ug college professor sa Cebu Technological University (CTU).