Top riders sa 2014 MS Motosuit Motocross Series pasidunggan na karong sabado

CEBU, Philippines – Ang mga top riders sa 2014 MS Motosuit Motocross Series pormal nang pasidunggan sa kalampusan nga ilang nakab-ot atol sa usa ka bongga nga seremonyas karong Sabado sa gabii diha sa Teatro Casino sa Waterfront-Cebu City Hotel and Casino.

Ang tulo ka double champion nga sila si Jubenile Abellar, Roscel Gungob ug Jed Luna maoy nag-una sa listahan sa mga atleta nga ibayaw sa bantawan sa kadungganan human misidlak og maayo sa racetrack sa miaging tuig. Si Abellar maoy miguwa nga overall champion sa pro ug expert open, si Gungob maoy naghari sa executive A ug B, samtang si Luna maoy nanghawod sa open enduro ug beginners open production.

Sila si John Flores ug BJ Pepito nga maoy kampiyon sa intermediate ug mini class 65cc, molugwa sab aron tunolan og  tropeyo uban nilang Keith Lloyd Abrenica (mini class 65cc), Alex Abalo (local enduro), JP Cuesta (beginners open production), Jonathan Cuyos (executive C) ug JayR Gualiza (underbone). Silang tanan kuwalipikado aron mamahimong  “Rider of the Year” nga pormal nga ipahibalo sa nanghinapos nga bahin sa programa nga pagasugdan sa alas-7 sa gabii.

Si bokal Joven Mondigo sa ikaupat nga distrito sa Sugbo maoy pinasidunggang dinapit sa maong kalihukan. Pormal siyang ipaila ni Madam Richell P. Pestañas, usa ka retiradong education program supervisor nga kasamtangang administrator sa usa ka pribadong tunghaan ug college professor sa Cebu Technological University.

“Bisan og medyo late na, nadasig gyud ko nga mopahigayon aning naandan na nato nga awards night aron mahatagan nato og saktong pasidungog ang atong mga riders sa maanindot nilang performance sa atong series sa miaging tuig,” matud pa ni MS Motosuit big boss Lou Ornopia, kanhi ‘Sportsman of the Year’ awardee sa Sportswriters Association of Cebu.  “Sentimental sab ko ani kay sa miagi man sab gud nga tuig nga nibalik ko og organize og mga race.”

Duha ka tuig ang milabay, si Ornopia nakahukom nga mopahuway una og  palumba  aron mahatagan niya og pagtagad ang iyang mga patigayon. Apan wala magdugay naagni si Ornopia nga mobalik sa nataran sa motocross niadtong tuig 2014. Gawas nga dili siya makabalibad sa hangyo sa  mga riders, literal na nga naglatay sa iyang ugat ug kabahin na sa iyang kinabuhi