CEBU, Philippines – Gipukan sa mga abogado sa Sugbo nga sakop sa Integrated Bar of the Philippines (IBP) Cebu City chapter ang ilang karibal gikan sa IBP-Davao City chapter sa iskor, 81-73 aron sakmiton ang titulo sa 15th IBP National Convention of Lawyers basketball tournament kaniadtong Huwebes sa gabii didto sa Capitol Parish gym sa dan Escario, ning dakbayan.
Ang IBP-Cebu City quintet didto nakabentaha sa ilawom pinaagi sa ilang big man nga si Venju Santiago kinsa maoy nagtimon sa opensa batok sa IBP-Davao City team pinaagi sa iyang 23 puntos.
Wala'y nakapiog sa gidak-on ni Santiago sa ilawom tungod kay igo lang sa pagkapyot ug pag-foul ang iyang mga karibal matag higayon nga makakupot siya'g bola o atol sa rebound battle.
Nanikay-sikay sab ang kanhi University of Cebu Webmasters skipper nga si Kenneth Kernn Sesante kinsa miabuno og 11 puntos ug siya maoy nagpahiluna sa duwa isip court general. Si Sesante, ang kanhi point guard sa Webmasters sa CESAFI, maoy nagduslit sa mainitong rally sa Cebu City-IBP didto sa fourth period aron makaginhawa og luag ang iyang team.
Miamot sab og 11 puntos ang laing big man ug kugihan kaayo nga si Richard Bauzon aron tabangan ang IBP-Cebu sa pagsakmit sa korona samtang ang laing IBP-Cebu big man nga si Van Ligutan miabuno og 15 puntos nga naglakip sa usa ka krusyal kaayong three-pointer nga maoy nagselyado sa kadaogan sa IBP-Cebu.
Didto nagsugod og buylo ang Cebu City-IBP sa second quarter dihang nagmangtas silang Santiago ug Resti Arnaiz kinsa maoy nagkumboya alang sa 14-3 scoring run aron mo-poste'g 29-19 nga abante alang sa mga Sugboanong dribbling lawyers may singko minutos sa wala pa ang halftime.
Mibawos ang Davao ubos sa ilang scoring machine nga si Armand Dioso kinsang three-point play maoy hinungdan nga nakatabla ang IBP-Davao sa iskor 35-all sa intermission.
Nahimong pisikal ang duwa didto sa third quarter apan wala gihapon mabangbang si Santiago kinsa nakakuha'g maayong suporta gikan nilang Sesante ug Ligutan alang sa 56-49 nga labaw sa IBP-Cebu City pagsugod sa fourth quarter.
Si Dioso maoy nangu sa IBP-Davao sa iyang 26 baskets.