CEBU, Philippines - Alang ni Philippine Sports Commission (PSC) chairman Ricardo ‘Richie’ Garcia, ang Cebu City Sports Commission (CCSC) mao na ang adunay labing dalaygon nga grassroots program lukop nasud.
Gumikan niini, ang PSC miisip sa sports development program sa CCSC nga sumbanan sa mga LGU.
Mismo ang mayor sa Dagupan nga si Belen Fernandez nangayo og tabang ni Garcia, kinsa mitudlo sa CCSC nga adunay igong katakus nga makatabang.
“I am always proud of the program of Cebu (City). Doon ko nakita how a grassroots program should be done. If we could duplicate the program in other cities, we will have less problems with our youth,” matud pa ni Garcia.
Si Mayor Fernandez nakigkita ni CCSC chairman Edward Hayco, kinsa misaad og tabang ug mihatag pa og handbook sa ilang grassroots development program alang sa Dagupan.
Si Fernandez gusto nga mapalambo ang ilang sports ug music aron usab paghatag og hayag nga kaugmaon sa ilang mga kabatan-onan ug pagtudlo kanila og disiplina.
“We are here sharing our recipe book but it’s the one who bakes it that make the cake rise. You can enhance our program. Be a creative chef, make do with what you have” matud pa ni Hayco.
Ang CCSC mopaambit usab sa Dagupan sa ilang malampusong mga programa bisan sa limitadong badyet. Usa usab sa gisugyot sa CCSC mao nga ang Dagupan mohimo og lig-on nga kooperasyon ngadto sa DepEd ug ubang pribadong sektor. (BANAT PALARO)