CEBU, Philippines – Gibayaw sa tumang himaya si Mary Joy Tabal human kini mitapos sa ika-12 nga puwesto sa iyang kategoriya ug 87th overall taliwala sa kapin sa 21,000 ka runners nga misalmot sa Aasics LA Marathon kagahapong adlawa didto sa Los Angeles, California.
Ang 25-anyos nga si Tabal mitapos sa maong 41 ka kilometro nga lumba sud sa duha ka oras, 51 minutos ug 17 segundos aron paglandig niini sa top 12 sa women’s 25-29 age group. Sa kinatibuk-an, si Tabal mipahiluna sa ika-87 nga puwesto.
Si Tabal, ang rayna sa marathon sa nasud diin siya sab maoy record-holder, doble ang kalipay kay iya man sab nalabwan ang iyang performance atol sa Paris Marathon sa miaging tuig diin siya mioras lamang og 2:57:28.
Ang laing Pinoy’ng entrante nga si Rafael Poliquit wala sab magpabitin kay nalandig kini sa ika-33 nga dapit sa men’s 25-29 age bracket sa oras nga 2:36:09. (BANAT NEWS)