Niños misidlak sa CIS swimfest

CEBU, Philippines – Ang Team Cebu City Niños maoy nanghawod sa 2nd Cebu International School Swim Meet. Misidlak pa og maayo ang Niños gumikan kay lima sa ilang mga sakop maoy gipasidunggang Most Outstanding Athletes sa tagsa-tagsa nila ka mga kategoriya sa maong usa ka adlaw nga kompetisyon niadtong Sabado didto sa CIS.

Ang Niños mikabkab og kinatibuk-ang 1,050 puntos aron pagsakmit sa kampiyonato. Gisundan kini sa Talisay Aqua Blazers Swim Team bitbit ang 673 puntos, samtang ang Sacred Heart School-Ateneo de Cebu mipahiluna sa ikatulong puwesto sa natali niining 526 puntos.

Wa sab magpabitin ang host CIS kay mitapos kini sa ikaupat ka dapit dala ang 247 puntos, samtang ang University of San Carlos maoy ikalima sa naangkon niini 105 puntos. Ikaunom ang University of Bohol Rockets nga adunay 103 puntos ug surprisang nangiwit ang Silliman University Red Stallions nga nakapasol lamang og 84 puntos.

Nakadugang og kahayag sa natagamtaman nga kalampusan sa Niños mao ang lima niini ka MOA awardees nga sila si Mike Gabrielle de la Serna (boys 8-under), Shane Allyne Pareja (girls 15-16), ang managsuong si Jobert ug Karen Mae Indaya (boys 11-12 ug girls 13-14) ug Clarence Israel Oreisga (boys 17-18). (BANAT NEWS)