Jazz nakasagunson og lima

CEBU, Philippines – Nabawi ni Trey Burke ang ngil-ad niyang mga duwa sa miaging pipila ka adlaw ug gisalbar niya ang Utah Jazz ngadto sa 88-85 nga kadaogan batok sa Detroit Pistons kagahapon didto sa Energy Solutions Arena sa Salt  Lake City, Utah.

Nakadawat og pasa si Burke gikan ni Gordon Hayward sa walang bahin sa ilang korte ug mi-iskor og pinabandang tirada sa nahibiling 13.1 segundos alang sa game-winning basket aron hatagan ang Jazz sa ilang ikalimang sagunson nga daog nga maoy ilang season-high.

''It feels good. Just got to stay confident, keep shooting the ball and making aggressive plays for the team," matod pa ni Burke.

Si Burke mi-iskor lang og nuybe puntos tungod kay nakuhaan ang iyang playing time tungod sa ilang rookie  nga si Dante Exum samtang si Derrick Favors maoy nangu sa Jazz sa iyang 26 puntos ug may upat ka block shots.

Ang Jazz aduna na karo'y 10-2 record human sa All-Star break.

Midugang og 10  puntos si Rudy Gobert , 19 ka rebounds ug duha ka blockshots samtang silang Exum ug Rodney Hood nagkumboya og 20 puntos.

''I'm improving a lot. Coach trusts me to actually go to me in the post. ... The team's starting to trust me a lot more in the post. They're starting to get me going early," matod pa gyud ni Favors.

Ang Pistons nahiagom  na og siyam ka sunod-sunod nga pilde ug lakip niini ang ilang kapildehan sa Jazz.

Maayo unta nakaduwa ang Pistons didto sa fourth period apan mas maayong migamit sa ilang game plan ang Jazz didto sa ilang homecourt.

Ang pull-up jumper ni Hood maoy naghatag sa Jazz og 84-81 nga bentaha ug dayon mihansak si Hayward alang sa 86-83 nga labaw sa kataposang 37 segundos sa duwa.

''That team we played played so hard. To come out on a back-to-back and play the way they did, as hard as they did, we were lucky to get out there,'' matod pa ni Jazz coach Quin Snyder.

Si Greg Monreo maoy nangu sa Pistons sa iyang 16 puntos ug 12 ka rebounds ingon man sab duha ka blocks samtang may 14 puntos si Anthony Tolliver  gikan sa bench.

Matod pa sa Pistons coach nga  si  Stan Van Gundy ''When we move the ball we were fine and we wouldn't move it, guys just wanted to dribble the air out of it.  We just didn't do a good job. I thought both of our point guards got stuck on the ball. We have some other guys, fatigue they just didn't move the ball.

Wala madayon ang gikahinaman unta nga Gobert-Andre Drummond matchup tungod kay wala makatiwas og duwa si Drummond sa Pistons kinsa miuli human sa halftime dihang naka-angkon siya'g mga bun-og sa milabay nga mga duwa. (gikan sa NBA.com) (BANAT NEWS)