CEBU, Philippines - Ang ikatulong edisyon sa Brgy. Capt. Lou Ornopia Developmental Basketball League mosikad karong Sabado didto sa Calambua open court, lungsod sa San Remigio, amihanang bahin sa Sugbo.
Moabot ngadto sa P50,000 ang ganting salapi nga iapud-apud sa mga mananaog sa torneyo nga gibahin sa duha ka kategoriya -- inter-barangay alang sa mga magduduwa nga nag-edad og 18-anyos paubos ug inter-Purok alang sa mga partisipante nga 15- anyos paubos.
Ang kompetisyon magsubay og single round robin format, diin ang top four moabante sa semifinals. Moduwa sila og laing round robin diin ang top two maoy magbugno alang sa kampiyonato.
Aron hashason og maayo ang mga game officials ingon man ang mga entrante, si event organizer Lou Ornopia nagkanayon nga mipahigayon sila og basketball clinic ug officiating seminar nga gipasiugdahan nilang Ed Aguelo sa Cebu Schools Athletic Foundation Inc. (CESAFI) ug Alan Cardenas sa Cebu Basketball Referees Association (CEBRA).
Si Jaime Pepito, ang teacher-in-charge sa Calambua Integrated High School, maoy mopadagan sa torneyo isip tsirman sa komitiba sa paugnat sa kusog.
Ang usa ka bulan nga liga gipaluyohan sa MS Motosuit, F&FO Motor Parts, RMO Motor Parts, Anie Navarez, New MS Apartelle, Motomaze, Aike Motor Parts, JCO Motor Parts, Diosdado Navarez, Pro Speed Motorparts, NF Enterprises, 94 MC Parts, Rizmar de la Peña, Evelyn Concillado ug ABC Garments inabagan nilang kongresista Benhur Salimbangon, bokal Sun Shimura ug Joven Mondigo ug San Remigio Vice Mayor Al Pestolante. (BANAT NEWS)