CEBU, Philippines - Miiskor og dakung kadaugan ang Sacramento Kings human nila gipilde ang mas lig-on nga Memphis Grizzlies, 102-90 sa nagpadayong duwa sa NBA kagahapon.
Si Rudy Gay miburak og 28 puntos, samtang si DeMarcus Cousins adunay 16 puntos ug siyam ka rebounds aron baswaton ang Kings ngadto sa kadaugan.
Nakatabang og daku si Cousins bisan pa sa iyang foul trouble ug diriyot pa makig-away sa bigman sa Grizzlies nga si Zach Randolph. Si Cousins maoy nagduslit sa ilang 10-0 run pagsugod sa fourth quarter diin miiskor siya og walo ka sunod-sunod nga puntos aron molabaw og nuybe puntos, 86-77.
Ang lay-up ni Cousins maoy nakapadaku sa ilang bentaha, 99-85 nga maoy labing daku nilang labaw nga nahimo. Apan wala madugay si Cousins gitawagan sa iyang ikalimang foul.
Wala makaiskor ang Kings sa unang kapin kuwatro minutos sa third period, apan ang Memphis igo lang naglabaw og usa ka lugas pagsugod sa fourth quarter, 77-76.
Didto na magmangtas ang Kings sa fourth period aron ma-upset ang Grizzlies.
Sa laing bahin, labing menos upat ka upsets ang nahitabo kagahapon dihang ang Charlotte Bobcats midaog batok sa Chicago Bulls, 98-86, ang Minnesota Timberwolves midaog sa Washington, 97-77, ang L.A. Lakers mipilde sa Utah Jazz, 106-97 ug ang Portland TrailBlazers midaog batok sa San Antonio Spurs, 111-95. (BANAT PALARO)