CEBU, Philippines – Midaku ang paglaum sa Carkiena nga moabante sa semifinals human nila gilubong ang Jetti, 93-67 sa 3rd Consolacion Barkadahan Basketball League-VIMBRA tournament niadtong Domingo didto sa Barangay Pulpogan gym sa Consolacion, Cebu.
Tulo ka players sa Carkiena ang miiskor og double figures sa pagpangulo ni Cesar Braggy pinaagi sa iyang 20 puntos.
Ang Carkiena nga gipaluyohan sa Vendredi Ballclub nagbitbit na karon og 2-0 nga baraha ning maong torneyo nga gisuportahan sa Erika’s Delight Bakeshop ug sa Rich Banana Catsup.
Si Garry Rojas mitampo’g 11 puntos alang sa Carkiena nga nakapanimaho na og sayong kadaugan human moposte’g 52-28 sa halftime.
Miburot pa ang labaw ngadto sa 35 puntos sa nahabiling 5:30 sa final period, 78-43 sa basket ni Rojas sa wala pa nila maangkon ang ilang ikaduhang sunod-sunod nga daog.
Ang naparot nga Jetti nga wala pa katilaw og daog sud sa duha ka duwa gipangulohan sab ni Jonathan Manzo, kinsa miratsada og 18 puntos.
Ang mga duwa gidumala ni league organizer Edward Escorial, inabagan nilang Noel Calo, Cresente Pilapil ug Kenneth Tagalog sa VIMBRA ug ingon man ni Rey Cortes.
Puntos Matag Usa
CARKIENA (93) – Braggy 20, Avesha 14, Rojas 11, Blair 9, Juanillo 9, Sanchez 9, Burlaos 6, Abrasado 6, Marchin 5.
JETTI (67) – Manzo 18, Capuyan 10, Ocio 8, Ebao 6, Obiña 5, Dulce 5, Salinas 5, Fernando 4, Paclibar 4, Huelar 2, Caparoso 2. (BANAT NEWS)