CEBU, Philippines – Maayong balita ang miabot ni Cebu City Sports (CCSC) Commissioner Lorenzo ‘Chao’ Sy dihang midaog si Antonio Raga ug angayan siya nga magpasalamat sa mga tigpasiugda sa paghatag kaniya’g wild card sa simultaneous 2015 MP World 10-Ball Championship didto sa SM City-General Santos City.
Ang 2015 Sinulog Cup champion nga si Raga midaog sa iyang katapusang re-entry ug maoy iyang gipilde ang Canadian cue artist nga si Richer Francouer , 7-4.
Tulo una ka higayon ang gilabang ni Raga aron magpabiling buhi sa iyang kampanya. Kaduha siya mapilde sa qualifying round sa Manila ug usa sa GenSan sa miaging adlaw.
Napilde si Raga ni Christian Garandia sa Iloilo City, 5-7 sa ilang Race to 7 qualifying round ug napilde sab siya ni Asis Tadique diin natagak na siya sa qualifying round alang sa singles event.
Si Raga kinsa nagrepresentar sa CCSC, gihatagan og wild card tungod kay diyutay ra ang misalmot sa maong torneyo ug sa maong kadaugan, lakip siya sa 128 ka players nga miabante. Laing contender mao si Ruben Cuna kinsa gilauman nga makahatag og dungog sa Sugbo. (BANAT NEWS)