Hangtod nga way gipirmahang kontrata, mas maayong dili lang una maglaum ang mga boxing fans sa ‘superfight’ tali nila ni Manny Pacquiao ug ni undefeated boxer Floyd Mayweather Jr.
Hinuon, daghan nang nanggawas nga mga nindot nga balita bahin niini, apan sa gikaingon ko na mas maayong magpaabot nalang ta sa kontrata. Naila na man gud ni si Mayweather nga mag-usab-usab ang pamahayag.
Siya pa gani ang miingon nga kun duna g’yud sila’y sangka ni Pacquiao siya mismo maoy moanunsiyo niini.
Apan kun atong tan-awon og maayo ang dagan sa mga balita ug kasikas sa boxing world diha sa mga boxing forums, mura’g daku g’yud ang kahigayonan nga mahinayon kini.
Gani pipila sa mga lihok nila ni Mayweather ug Pacquiao mura’g padung didto, apan ilaha lang g’yud segurong gipahinam-hinam, pataas sa presyo ba.
Wala hinuon kini angkona sa duha ka habig. Sa akong tan-aw dunay “gentlemen’s agreement” ang duha nga si Floyd ray moanunsiyo.
Papresyo g’yud og maayo si Mayweather kay lagi, matud niya daghan pa siyang kapilian gawas ni Pacquiao.
Samtang si Pacquiao nga miangkong usa siya ka “entertainer” gusto niya ang maong sangka dili tungod sa kuwarta kun dili alang sa boxing fans. Seguro alang pud sa katagbawan ug kay nagkaduol na man siguro ang iyang pagretiro.
Apan bisan kinsa pa’y kontrahon ni Pacquiao sa bulan sa Mayo, kinahanglang magsugod na siya og bansay-bansay karon pa lang daan aron dili kuwangon sa panahon.
Kay basin taktika lang ni Mayweather nga siya’y magbuot kun kanus-a moanunsiyo ug mopirma sa kontrata aron dili kaayo makapangandam og tarong si Pacquiao. O ba kaha mao na g’yud ni ang ilang gikasabotan.
* * *
PAGTULON-AN: “To become the enemy, see yourself as the enemy of the enemy.” -- Miyamoto Musashi