CEBU, Philippines – Nagpabiling walay pilde ang Meralco Bolts human sila mihimo’g ‘come-from-behind’ nga kadaugan batok sa Rain or Shine Elasto Painters, 92-87 sa ilang duwa sa 2015 PBA Commissioner’s Cup kagabii didto sa Smart Araneta Coliseum.
Sa kasamtangan, ang Bolts nagsolo sa liderato sa standing sa ilang limpiyong 4-0 nga win-loss record.
Naglabaw kanunay ang Bolts sa halos first half, apan sa mga paningkamot ni import Richard Jackson Paul ug Ryan Araña, nasakmit sa Rain or Shine ang labaw, 47-41 sa halftime.
Nagpadayon ang ataki sa Painters, ning higayona milihok sila si Gabe Norwood ug JR Quinahan. Ang Painters miinat sa ilang labaw 73-62 sa katapusang 1:02 sa maong kuwarter.
Apan hinay-hinay nga miapas ang Bolts, gamit ang ilang nagtuasik nga three-point shooting ug paningkamot sa import nga si Josh Davis. Natabla nila ang iskor, 78-all sa nahibiling otso minutos sa duwa human sa tira ni Mike Cortez
Ang maong rally maoy naghatag sa Bolts sa momentum ug nakuha nila ang dos puntos nga labaw sa nahibiling 1:50 human sa free-throw ni Sean Anthony.
Si Davis mirehistro og 31 puntos ug 14 ka rebounds uban ang upat ka blocks ug upat sab ka assists alang sa Bolts. (BANAT NEWS)