Mga Badjao gi-train sa CCSC

CEBU, Philippines - Ang Cebu City Sports Commission (CCSC) ubos sa liderato ni Edward Hayco pormal nga milusad kagahapon sa talagsaon nilang programa diin ang 40 ka mga bata nga Badjao bansay-bansayon og maayo sa tinguha nga mamahimo silang tang-an nga mga swimmers sa umaabot.

Matud pa ni Hayco nga ang maong proyekto hapit mag-usa ka tuig nilang giplano kay gawas nga ila unang hagpaton og maayo kun kinsa’y angayan nga maapil sa maong programa, nangita sab sila og  saktong binyu nga haom sa iyang tumong ug katuyoan.

Isip pasiunang lakang aron masugdan ang maong kalihukan, ang CCSC miduol ni DepEd Cebu City Schools Division Superintendent Rhea Mar Angtud, nga midala sab dayon kanila sa Alaska Elementary School sa Mambaling diin sila nakasigpat og usa ka classroom nga puno og estudyanteng mga Badjao.

Sud sa usa ka semana, ang sports commission nangayo gilayon og permiso sa mga ginikanan sa mga bata nga misangon sab dayon gumikan kay alang man kini sa kaayohan sa ilang mga anak. Ang mga napilian nga bata gitugyanan og mga ekipo sama sa swim suits, swim caps, towels ug bags.

Ang mga bata nga nag-edad og otso hangtod sa 12 anyos mipaubos sa briefing ug orientation ubos ni coach Rolando Alvarez. Matud pa ni Alvarez nga mataud-tauran pa usa makat-on sa mga saktong teknik sa  paglangoy ang mga bata kay lahi man nga klase sa langoy ang ilang naandan.

Ang maong programa sa CCSC seguradong makaabli sa pultahan alang sa maayong kaugmaon sa pipila ka batang Badjao, kansang uban kanila makita nga nagpakilimos pinaagi sa pagpanuktok sa pultahan sa mga sakyanan sa kadalanan. Ang uban adto sa pier mag-atang nga itsahan og sinsiyo sa mga pasahero sa modunggoay nga barko dayon ilang daybon ug tidlumon ilawom sa dagat nga peligroso kaayo.

Target sa sports commission nga maka-train og 200 ka mga Badjao sa hustong pamaagi sa paglangoy nga maayo unya ang hagdanan aron sila hingpit nga mamahimong atleta.