CEBU, Philippines - Ang Sugbuanong tennis player nga si Jerico Bohol miabante sa semifinal round sa FCTGB-Chairman’s Cup tennis tournament didto sa nasud sa Bahrain.
Si Bohol nakakuha og luna sa semis human niya gipukan ang kababayan nga si Jojo Fernandez, 6-2-6-1.
Maninguha si Bohol nga modaog sa katapusan niyang duwa sa elimination round aron makakuha og maayong seeding paingon sa crossover semifinals.
Samtang magpaabot sa iyang duwa sa semis, si Bohol mopakita’g aksiyon sa Bahrain Tennis Federation Tennis League.
Sa maong torneyo si Bohol moduwa uban ang taga-Leyte nga si Raymund Leano, anaa usab ang ubang Pinoy netters nga sila si Gilbert Sinocruz, Carlo dela Rosa, Norman Abastillas, Ervin Timola,Ronie Cifra ug Rizal Respicio nga pulos taga-Manila.
Damgo sa Pinoy nga dominahon na sab nila ang torneyo nga ilang nabuhat niadtong 2012. (BANAT NEWS)